კალაძე: შევქმენით ახალი პროგრამა, რომლის სახელია „60+“, ბევრი ადამიანია 60 წლის ზემოთ, გვინდა მათთვის შევქმნათ შესაბამისი სივრცეები ქალაქის ყველა რაიონში

232

შევქმენით ახალი პროგრამა, რომლის სახელია „60 +“, ბევრი ადამიანია 60 წლის ზემოთ, გვინდა მათთვის შევქმნათ შესაბამისი სივრცეები ქალაქის ყველა რაიონში, – განაცხადა კახა კალაძემ სოციალური პოლიტიკის ძირითადი პროგრამების პრეზენტაციაზე. მისივე თქმით, თბილისის ყველა რაიონში მრავალპროფილური საუბნო ცენტრები შეიქმნება, სადაც 60 წელს მიღწეული თბილისელები კულტურული, გასართობი, საგანმანათლებლო, სოციალური და სხვა აქტივობების განხორციელებას შეძლებენ.

„ძალიან ბევრი ვიმუშავეთ, რათა შეგვექმნა ახალი პროგრამა, რომლის სახელია „60 +“. გვყავს ძალიან ბევრი ადამიანი 60 წლის და ზემოთ, გვინდა. გვინდა მათთვის შევქმნათ შესაბამისი სივრცეები ქალაქის ყველა რაიონში. დღესაც არის ასეთი სივრცეები, მაგრამ ისინი არ არის კეთილმოწყობილი – ღია სივრცეებია, სადაც ეს ადამიანები იკრიბებიან და ზოგი ნარდს თამაშობს, ზოგი დომინოს და ა.შ. გვინდა, ეს სივრცეები უფრო თანამედროვე, უფრო ცივილიზებული გავხადოთ. ასეთი სივრცეები შეიქმნება სკვერებში, პარკებში, სადაც მათ შესაძლებლობა ექნებათ, შეიკრიბონ, იმსჯელონ სხვადასხვა საკითხებზე. გვინდა, ეს ადამიანები ჩავრთოთ გადაწყვეტილების მიღებაში. თავად გადაწყვიტონ, თავიანთ რაიონში, უბნებში, ქუჩებზე რომელი პროექტი უნდა განხორციელდეს, რომელია პრიორიტეტი. ვფიქრობ, ეს ძალიან საინტერესო პროექტია ამ ასაკის ადამიანებისთვის. როდესაც ვხვდებოდით მოსახლეობას, ამ ასაკის მოქალაქეებისგან ძალიან დიდი იყო ამაზე მოთხოვნა და ძალიან სასიამოვნოა, რომ ჩვენს საარჩევნო პროგრამაში უკვე კონკრეტული პროექტის სახითაა წარმოდგენილი“, – განაცხადა კახა კალაძემ.

პრეზენტაციაზე მერის მოადგილემ ილია ელოშვილმა აღნიშნა, რომ კახა კალაძის არჩევის შემთხვევაში, ხანდაზმულ მოქალაქეებზე ზრუნვა მისი გუნდის აბსოლუტური პრიორიტეტი იქნება მომავალშიც.