რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია რეგიონებში ინფრასტრუქტურულ სამუშაოებს აქტიურად განაგრძობს. უწყების პრესსამსახურის ცნობით, დასრულების ეტაპზეა ქალაქ გორში, კვერნაკის დასახლების უწყვეტი წყალმომარაგებისთვის მიმდინარე სამშენებლო სამუშაოები.
მათი ინფორმაციით, რეზერვუარი, რომელიც კვერნაკის დასახლებას წყალმომარაგებით უზრუნველყოფს, 1965 წელს არის აგებული და მას შემდეგ რეაბილიტაცია არ ჩატარებია.
„არსებული მილები მოძველებულია, რის გამოც მოსახლეობას წყალი დღის განმავლობაში რამდენიმე საათით მიეწოდება. სამუშაოების ფარგლებში მოეწყო 800 კმ-მდე მაგისტრალური მილი, ამ ეტაპზე რეზერვუარის რეაბილიტაცია მიმდინარეობს, ინდივიდუალურად გამრიცხველიანდება მოსახლეობა.
პროექტი მიმდინარე წლის აგვისტოში დასრულდება, რის შემდეგაც კვერნაკის დასახლებაში მცხოვრები 700-მდე ადამიანი სტაბილური წყალმომარაგებით იქნება უზრუნველყოფილი“,-აღნიშნულია ინფორმაციაში.
