ჩემი დაკვირვებით, დღევანდელი მონაცემებით, იმ სიტუაციაში, რასაც ახლა ოპოზიციაში ვხედავ, ვფიქრობ, კახა კალაძე მოიგებს, – ამის შესახებ „გირჩის“ ერთ-ერთმა ლიდერმა იაგო ხვიჩიამ „ედისონ რისერჩის“ კვლევის შედეგებთან დაკავშირებით განაცხადა.
ამასთან, მან კვლევის ფარგლებში გიორგი გახარიას პარტიის სასარგებლოდ დაფიქსირებულ მაჩვენებელზეც ისაუბრა.
„თუ ამ კვლევას დავაკვირდებით, ჩანს, რომ დაკლებულია „ქართული ოცნების“ რეიტინგი და მის ადგილზე გაჩნდა ახალი მოთამაშე, ისევ „ქართული ოცნების“ წარსულით. მე არ ვიცი საბოლოოდ, რამდენად ექნება არჩევნებზე 13%, მოლოდინი ნაკლები მაქვს, თუმცა ახლა ეს შედეგი წარმატებად შეიძლება ჩაითვალოს გახარიას გუნდისთვის“,- განაცხადა ხვიჩიამ.
ცნობისთვის, ტელეკომპანია „ფორმულა“ Edison Research-ის კვლევის შედეგებს აქვეყნებს. Edison Research-ის კვლევის თანახმად, მოსახლეობის 57% ყოფილი პრემიერის გიორგი გახარიას მიმართ დადებითადაა განწყობილი, გამოკითხულთა 50%-ს კი თბილისის მერის, კახა კალაძის მიმართ დადებითი განწყობა აქვს; 47%-ს პოზიტიური განწყობა აქვს „ერთიანი ნაციონალური მოძრაობის“ თავმჯდომარის, ნიკა მელიას მიმართ.
