ვაკის რაიონის გამგეობის ინფრასტრუქტურული პროექტების ფარგლებში, ნუცუბიძის III მიკრორაიონის IV კვარტლის N1-8 კორპუსების მიმდებარე ტერიტორიაზე დასასვენებელი პარკის სარეაბილიტაციო სამუშაოები დაიწყო.
“ტერიტორიაზე, რომელიც 7 500 კვ. მ ფართობს მოიცავს, რამდენიმე სხვადასხვა ზონა შეიქმნება. მათ შორის, სავარჯიშო სივრცე, სადაც ტრენაჟორები დამონტაჟდება; საბავშვო-გასართობი ზონები – სხვადასხვა ატრაქციონით ფიზიკური აქტივობებისთვის; მოსასვენებელი პავილიონები და სხვა ურბანული ავეჯი. პარკის სავალი ბილიკები მოპირკეთდება ფილებით, დამონტაჟდება განათების ქსელი, სასმელი წყლის ე.წ. „სოკო“, მოეწყობა შადრევანი.
გარდა ამისა, ტერიტორიაზე გამწვანების სამუშაოები შესრულდება – დაირგვება სხვადასხვა სახის მცენარეები, ხეები და ბალახი”, – განმარტავენ გამგეობაში.
პარკის განახლებას გამგეობის ბიუჯეტიდან 984 000 ლარი მოხმარდება.
„დავიწყეთ მასშტაბური პროექტის განხორციელება – ადგილობრივების თხოვნით, ნუცუბიძის III მიკრორაიონში განთავსებულ დიდ პარკს ჩაუტარდება სრული რეაბილიტაცია. საკმაოდ დიდი ტერიტორიაა, სადაც მიმდებარე კორპუსების სხვადასხვა ასაკის მცხოვრებლები ხშირად იკრიბებიან. ჩვენი პროექტის შესაბამისად, გათვალისწინებულია ყველა ამ ადამიანის ინტერესი და მოთხოვნა. კეთილმოწყობილ და გამწვანებულ გარემოში შექმნილი იქნება ყველა პირობა სასიამოვნო და კარგი დასვენებისთვის“, – განაცხადა ვაკის რაიონის გამგებელმა, დავით კვინიკაძემ.
