ზაჰესის ხიდთან გზის ნაწილი ჩაინგრა

695

დღეს დილით ზაჰესის ხიდთან მისასვლელი გზის მონაკვეთი ჩაინგრა. საავტომობილო გზის დაზიანება   წყლის 1000-მილიმეტრიანი მილის დაზიანებამ გამოიწვია. შემთხვევის ადგილზე საპატრულო პოლიცია და გლდანის რაიონის გამგებელმა დიმიტრი ორმოცაძე იმყოფებოდა.  ამ ეტაპზე მოძრაობა გადაკეტილია. ადგილზე მობილიზებულია მძიმე ტექნიკა.  კომპანია „ჯორჯიან უოთერ ენდ ფაუერის“ ოპერაციების მართვის დირექტორის  მამუკა კიკალიშვილის ინფორმაციით, ადგილზე მათი კომპანიის ბრიგადები იმყოფებიან და პრობლემის დიაგნოსტირებას ახდენენ.

„შემოვიდა ინფორმაცია, რომ მოხდა გზის ნაწილის ჩანგრევა. ჩვენი ბრიგადები ოპერატიულად მივიდნენ ადგილზე და ახლაც იქ მუშობენ. ჯერჯერობით ჩვენთვის მომხდარის მიზეზი უცნობია. ჩანს, რომ წყლის მილია დაზიანებული. ჩანგრევის შედეგად დაზიანდა თუ რამ გამოიწვია, ამას გავარკვევთ. წყლის მიწოდებაც უკვე დაკეტილია. სამუშაოები ალბათ დღის ბოლომდე დასრულდება“, – განაცხადა მამუკა კიკალეიშვილმა.

მისივე თქმით, წყალი ურდულით დაიკეტა და ჯერ აბონენტებს წყლის მიწოდება არ შეწყვეტიათ.

„ადგილზე რამდენიმე მაგისტრალური წყალსადენი მილი გადის. სავარაუდოდ 1000 მილიმეტრიანი მილი დაზიანდა. ჯერჯერობით აბონენტებს წყლის მიწოდება არ შეწყვეტიათ. ახლა უბრალოდ ურდულით დაიკეტა და თუ წყლის მიწოდების შეზღუდვა მოგვიწევს, ამის შესახებ აბონენტებს ესემესებით შევატყობინებთ“, – აღნიშნა მამუკა კიკალეიშვილმა.

წყარო: ინტერპრესნიუსი