გორის მაჟორიტარი დეპუტატის, იოსებ მაკრახიძის ძმა, ალექსანდრე მაკრახიძე თავისი კომპანიის ეზოდან სტალინის ძეგლის გატანას ითხოვს. ინფორმაციას რადიო მოზაიკა ავრცელებს.
ალექსანდრე მაკრახიძის განმარტებით, ადგილობრივ ხელისუფლებას აღნიშნულის შესახებ 8 წლის განმავლობაში არაერთხელ მიმართა, თუმცა ძეგლი ისევ ,,არქმშენსტუდია 2002“-ის ტერიტორიაზე ინახება.
,,2010 წელს მაშინდელმა ხელისუფლებამ გააფორმა ხელშეკრულება ჩვენ კომპანიასთან და დავანგრიეთ ძეგლი. ჩემთვის არავის უკითხავს, მოიტანეს და დადეს ჩვენთან. მე პირადად სტალინს ძალიან დიდ პატივს ვცემ, მაგრამ ამ 8 წლის მანძილზე ამ ძეგლის სანახავად იმდენი ხალხი მიდი-მოდის, რომ ვწუხდებით ჩვენც. ვითხოვთ, გაიტანონ ეს ძეგლი და დადგან, სადაც საჭიროა. უკვე აღარ ვიცი, მოვესწრები თუ არა იმ დღეს, რომ ამ ძეგლს გაიტანენ ჩვენი ტერიტორიიდან“, – თქვა ალექსანდრე მაკრახიძემ.
საბჭოთა კავშირის ლიდერის, იოსებ სტალინისადმი მიძღვნილი ერთ-ერთი უკანასკნელი შემორჩენილი მონუმენტი მსოფლიოში, 2010 წლის 18 ოქტომბრამდე აღმართული იყო საქართველოში, სტალინის მშობლიური ქალაქის — გორის ცენტრალურ მოედანზე, სამხარეო ადმინისტრაციის შენობის წინ.
ძეგლი სტალინის სიცოცხლეში, 1952 წელს გაიხსნა.
