თბილისის მერიის ინიციატივით, დედაქალაქში მცირე და საშუალო სარესტორნე ბიზნესისთვის სუბსიდირების პროგრამის თანახმად, ობიექტებისთვის ფინანსური დახმარება 5 000 ლარით განისაზღვრა, ხოლო ერთი იურიდიული პირის მიერ ერთზე მეტი რესტორნის ოპერირების შემთხვევაში დაფინანსება 10 000 ლარს შეადგენს. ამის შესახებ თბილისის მერის მოადგილემ ანდრია ბასილაიამ ჟურნალისტებთან განაცხადა.
მერის მოადგილის თქმით, აღნიშნული ინიციატივა სარესტორნო ბიზნესის წარმომადგენლებთან აქტიური კომუნიკაციის შედეგად შემუშავდა.
„პანდემიამ მნიშვნელოვნად დააზარალა ეკონომიკის ბევრი დარგი, მათ შორის მნიშვნელოვანი ზარალი მიადგა იმ დარგებს, რომლებიც დამოკიდებულია ტურისტულ ნაკადებზე. თბილისის სარესტორნო ბიზნესი არის ის დარგი, რომელმაც სერიოზული დარტყმა მიიღო პანდემიიდან გამომდინარე. თბილისის მუნიციპალიტეტი თავიდანვე აქტიურ კომუნიკაციაში იყო მათთან და რამდენიმე ღონისძიება გაატარა, მათ შორის, საიჯარო ქირების მოხსნასთან თუ მუნიციპალური სივრცეების დათმობასთან დაკავშირებით, რომ გარეთ გამოეტანათ მაგიდები და სკამები.
ცენტრალურ დონეზე მოხდა სესხის სუბსიდირება პროცენტის ნაწილში. დიდი მადლობა მინდა, გადავუხადო პრემიერ-მინისტრს, რომ გაიზიარა ეს ინიციატივა, რომელიც წამოვიდა მცირე და საშუალო რესტორნებიდან. ჩვენ მათთან აქტიური კომუნიკაცია გვქონდა. ეს ინიციატივა ითვალისწინებს 5000-ლარიან ვაუჩერს, რომელიც გადაეცემა თბილისში არსებულ მცირე და საშუალო ზომის ბიზნესს“, – აღნიშნა ანდრია ბასილაიამ.
მისივე განმარტებით, პროგრამით სარგებლობისთვის საჭირო კრიტერიუმები დაკავშირებული იქნება რესტორნების ბრუნვასა და სკამების რაოდენობასთან.
ამასთან, ბასილაიამ აღნიშნა, რომ სუბსიდიების მისაღებად დადგენილ კრიტერიუმებს, დაახლოებით, 400 რესტორანი დააკმაყოფილებს.
„კრიტერიუმები რამდენიმე დღეში გამოქვეყნდება და იქნება მარტივი აპლიკაციის ფორმა, რომელსაც ისინი შეავსებენ. კრიტერიუმები იქნება ბრუნვასთან და სკამების რაოდენობასთან დაკავშირებით. ასევე, ამ პროგრამით ვერ ისარგებლებენ მსხვილი ბიზნესები, “ფრენჩაიზები”, საერთაშორისო ქსელის ოპერატორები. ეს არის გათვლილი თბილისში მოქმედ მცირე და საშუალო ბიზნესებზე. კრიტერიუმები ზუსტდება და მომდევნო დღეებში დაანონსდება. დაახლოებით, 400 რესტორანი დააკმაყოფილებს კრიტერიუმებს და ისარგებლებს აღნიშნული პროგრამით“, – განაცხადა ანდრია ბასილაიამ.
უწყების ცნობით, სუბსიდიას მიიღებს ყველა ობიექტი, რომელიც 2020 წლის 28 ნოემბრამდე დარეგისტრირდა.
