ზუბალაშვილების ქუჩაზე სახლის კაპიტალური გამაგრება მიმდინარეობს

596

მთაწმინდის რაიონში, ძმ. ზუბალაშვილების ქ. N8-ში, საცხოვრებელი სახლის კაპიტალური გამაგრება მიმდინარეობს. პროექტის ფარგლებში, შენობის საძირკვლის გამაგრება და კედლების მოწყობა, ლითონის ელემენტებით ფანჯრებისა და კარის ღიობების მოჩარჩოება, ბზარების დამუშავება და სპეციალური მასალით შევსება მოხდება, – ამის შესახებ ინფორმაციას თბილისის მერია ავრცელებს.

მათივე ინფორმაციით, მიმდინარე სამუშაო პროცესს მთაწმინდის რაიონის გამგებელი დავით კირკიტაძე გაეცნო.

მისი თქმით, მაქსიმალურად ცდილობენ ბინათმესაკუთრეთა ამხანაგობების განვითარების ხელშეწყობის პროგრამის ფარგლებში ყველა სახლი გაამაგრონ.

„მთაწმინდის რაიონში მსგავსი პრობლემის წინაშე ბევრი სახლი დგას, თუმცა ჩვენ მაქსიმალურად ვცდილობთ ბინათმესაკუთრეთა ამხანაგობების განვითარების ხელშეწყობის პროგრამის ფარგლებში გავამაგროთ ყველა სახლი და ადგილობრივ მოსახლეობას გავუუმჯობესოთ საცხოვრებელი პირობები. წელს, უკვე შვიდი სახლი გავამაგრეთ, ხუთის გამაგრება კი მიმდინარეობს. მსგავსი პროექტების განხორციელება წლის ბოლომდე გაგრძელდება“, – განაცხადა დავით კირკიტაძემ.

ამაჟამად, აღნიშნულ შენობაში 11 ოჯახი ცხოვრობს. შენობის გამაგრების შემდეგ, მათი საცხოვრებელი პირობები საგრძნობლად გაუმჯობესდება.
სამუშაოების განხორციელებისთვის გამგეობის ბიუჯეტიდან 197 ათასი ლარი დაიხარჯება.