მოხარული ვარ, რომ ძალიან მალე ჩვენს ქალაქებში ქართული წარმოების ელექტრომობილები გამოჩნდება, – შესახებ ეკონომიკისა და მდგრადი განვითარების მინისტრმა ნათია თურნავამ განაცხადა.
ეკონომიკისა და მდგრადი განვითარების სამინისტროს ინფორმაციით, უახლოესი თვეების განმავლობაში ქუთაისში ელექტრომობილების ქარხნის მშენებლობა დაიწყება, რაც რეგიონში პირველი პრეცენდენტია.
“ეს იქნება საკმაოდ მაღალტექნოლოგიური წარმოება, საქართველო განამტკიცებს თავის პოზიციებს და გახდება მაღალტექნოლოგიური პროდუქციის ექსპორტიორი ევროპაში, რაც ძალიან მნიშვნელოვანია“, – განაცხადა თურნავამ.
მათივე ინფორმაციით, ქუთაისში ელექტრომობილების ქარხნის მშენებლობასთან დაკავშირებით დღეს ხელი მოეწერა სამ მემორანდუმს: საქართველოს ეკონომიკისა და მდგრადი განვითარების სამინისტროსა და კომპანია “აი გრუპს“, სსიპ სახელმწიფო ქონების ეროვნული სააგენტოსა და კომპანია “აი გრუპს“, აგრეთვე კომპანია “აი გრუპსა“ და ჩინურ კომპანია „ჩანგანს“ შორის.
შეგახსენებთ, რომ ქუთაისში ელექტრომობილების ქარხნის მშენებლობა ორი თვის წინ საქართველოს პრემიერმინისტრმა მამუკა ბახტაძემ დააანონსა.
“ვასრულებთ ამ დანაპირებს, ხელი მოვაწერეთ რამდენიმე ხელშეკრულებას კომპანია “აი გრუპთან“ და მათ პარტნიორ კომპანია “ჩანგანთან“. ძალიან მნიშვნელოვანია, რომ ჩვენი გადაწყვეტილებით ეს ქარხანა აშენდება ქუთაისში, რომელიც მდიდარია მანქანათმშენებლობის ტრადიციებით და ეს ტრადიცია ჩვენ უნდა ავაღორძინოთ, ამისთვის სახელმწიფო კომპანიას გადასცემს შესაბამის მიწას და მხარს დაუჭერს ქარხნის მშენებლობას“ – განაცხადა ნათია თურნავამ
კომპანია “აი გრუპი“ ქუთაისში 100 ჰა ფართობის ტერიტორიაზე 24 თვის ვადაში ელექტრომობილების მწარმოებელ საწარმოს ააშენებს. ქარხანაში თავდაპირველად, დაახლოებით, 300 ადგილობრივი მოსახლე დასაქმდება, თუმცა, პროექტის განვითარებასთან ერთად კომპანია გეგმავს დასაქმებულთა რაოდენობა 1000-მდე გაზარდოს. საწარმოს ამოქმედებიდან 18 თვის ვადაში არანაკლებ 5000 ელექტრომობილი დამზადდება.
ეკონომიკისა და მდგრადი განვითარების მინისტრმა დღეს ხაზი გაუსვა საქართველოში „მწვანე ეკონომიკის“ განვითარების მნიშვნელობას. როგორც ნათია თურნავამ აღნიშნა, მწვანე ეკონომიკის განვითარება მთავრობის გაცხადებული პოლიტიკური პრიორიტეტია, რაც სხვა საკითხებთან ერთად ქვეყანაში ეკოლოგიურად სუფთა სატრანსპორტო საშუალებების გამოყენებასაც გულისხმობს, ამაში კი ახალი ქარხნის პროდუქცია თავის წვლილს შეიტანს.
