თბილისის მერის კახა კალაძის თქმით, თბილისობის დღესასწაულზე გარევაჭრობა ნებადართული იქნება.
მისი ინფორმაციით, გარევაჭრობა დასაშვები იქნება: ჩუღურეთის რაიონში, ხეთაგუროვის სკვერიდან ბარათაშვილის ხიდამდე ტერიტორიაზე; სამგორში, ვიქტორ კუპრავას ქუჩის N10, ე.წ. სვანების ბაზრობის ტერიტორიაზე; გლდანში, ხიზანიშვილის ქუჩაზე, გლდანის პარკსა და პოლიციის შენობას შორის არსებულ სივრცეში. ასევე, დიდუბეში, სტანისლავსკის ქუჩაზე, “დიდუბე პლაზას“ მიმდებარე ტერიტორიაზე; დიღმის მასივში, პაიჭაძის ქუჩა N1-ში, სკვერის მიმდებარე ტერიტორიაზე; საბურთალოზე, სპორტის სასახლის მიმდებარე ტერიტორიაზე; ვაკეში, გეგეშიძის ბაღში.
“ნებისმიერ ადამიანს შეუძლია, საკუთარი პროდუქცია ამ სივრცეში წარმოადგინოს და კონკრეტულად ამ ორი დღის განმავლობაში ეს იქნება თავისუფალი ვაჭრობის სივრცე, თბილისობის შემდეგ კი ამ ადგილებში გარევაჭრობა ისევ შეიზღუდება“, – განაცხადა კახა კალაძემ.
შეგახსენებთ, რომ თბილისობა 6-7 ოქტომბერს გაიმართება. როგორც კახა კალაძემ განაცხადა, თბილისობის აღნიშვნის ტრადიცია ოქტომბრის პირველ შაბათ-კვირას დამკვიდრდება.
