თბილისის მერიის გარემოს დაცვის საქალაქო სამსახურის უფროსმა, გიგა გიგაშვილმა განაცხადა, რომ დედაქალაქის მასშტაბით 20 ათასი დაავადებული ხის მოჭრა იგეგმება. მისი თქმით, 8 თვის განმავლობაში 120 ათასი ხეა შესწავლილი. ინფორმაციას ინტერპრესნიუსი ავრცელებს.
მისივე ინფორმაციით, სანიტარული ჭრები თბილისის მასშტაბით მომავალი კვირიდან დაიწყება.
“ვერ დავეთანხმები მოსაზრებას, რომ მძიმე მდგომარეობაშია ნარგავები თბილისის ტერიტორიაზე. მთავარი პრობლემა ჩვენ გვაქვს ფიჭვებთან მიმართებაში და ეს პრობლემა გუშინ და დღეს არ დაწყებულა, 1996-97 წლებიდან დაიწყო, ყველაზე დიდი განვითარება კი, 2000-იან წლებში ჰქონდა. ეს მხოლოდ თბილისის და საქართველოს პრობლემა არ არის, ევროპის განვითარებულ ქვეყნებშიც არსებობს. პირველადი აუცილებელი ღონისძიებები ჩავატარეთ, აღვწერეთ და მოვინიშნეთ დაავადებული ხეები და ეს დაახლოებით, 20 000 ძირია. მომავალი კვირიდან ვიწყებთ სანიტარულ ჭრებს, რათა გამოვათავისუფლოთ დაავადებული ხეებისგან ქალაქი და მოვახდინოთ დაავადების გავრცელების პრევენცია.
ლაბორატორიულმა კვლევებმაც დაადასტურა, რომ თბილისში არ არის პათოლოგიური დაავადება, ეს არის ჩვეულებრივი სოკოვანი დაავადება, რომელიც ნებისმიერ ხე-მცენარეს შეიძლება ჰქონდეს. პრევენციისთვის ორჯერ შევწამლეთ ხე-მცენარეები, რამაც პროცესი შეაჩერა. ასევე, ოქტომბრის დასაწყისში ველოდებით უცხოელ ექსპერტებს, რომლებიც ჩაატარებენ კვლევებს თუ რასთან გვაქვს საქმე, ასევე ჩატარდება ლაბორატორიული კვლევები ევროკავშირის აკრედიტირებულ ლაბორატორიებში, რომ დამატებით კიდევ განვსაზღვროთ ის ღონისძიებები, რომელიც აუცილებელი იქნება ამ მცენარეებთან. რაც შეეხება სხვა ღონისძიებებს, ეს არის ჩვეულებრივი, მიმდინარე პროცესი; მცენარეებს შესაძლოა გაუჩნდეთ მავნე დაავადებები ან მწერები, შესაბამისად, რეგულარულად ვატარებთ ფიტოსანიტარულ კვლევას. 8 თვის განმავლობაში შესწავლილია 120 ათასი ხე და გამოვლენილი დაავადებების შესაბამისად ორჯერ მოხდა მათი წამლობა. წლის ბოლომდე ამ ღონისძიებების მესამე ეტაპი განხორციელდება, ხოლო მომდევნო წლებში მასშტაბი კიდევ უფრო გაიზრდება“, – განაცხადა გიგაშვილმა.
