კრწანისის რაიონში, ტაბიძის N16-ში გრუნტის დამჭერი კედლის მოწყობა მიმდინარეობს. სამუშაოების ფარგლებში, 64 კვადრატული მეტრის ფართობზე რკინა-ბეტონი, 34 კვ.მ-ზე კი, ლითონის მოაჯირი მოეწყობა.
კრწანისის რაიონის გამგეობის ცნობით, კრწანისი-შინდისის დამაკავშირებელ მაგისტრალზე, რომელზეც ავტომობილების ინტენსიური მოძრაობაა, გზის ჩამოშლისა და მოცურების საფრთხე არსებობდა, რის გამოც, რაიონის გამგეობამ გრუნტის დამჭერი კედლის მოწყობის გადაწყვეტილება მიიღო. არსებულ მონაკვეთზე ასევე, მოეწყობა ტროტუარი.
სამუშაოები, რომლისთვისაც გამგეობის ბიუჯეტიდან 34 300 ლარია გამოყოფილი, აგვისტოს ბოლოს დასრულდება.
გამგეობის ცნობით, მიმდინარე წელს, ქვემო ფონიჭალის მოსახლეობისთვის რამდენიმე მისამართზე რეკრეაციული სივრცეები ეწყობა. ამ ეტაპზე, რუსთავის გზატკეცილის N18-ში მდებარე რეკრეაციულ სივრცეში გამწვანების სამუშაოები ტარდება, რუსთავის გზატკეცილის N19-ში მდებარე N4 კორპუსის მიმდებარედ კი, საბავშვო კუთხის მოწყობა უკვე დასრულებულია.
მიმდინარე წლის მესამე კვარტალში, რაიონში არსებულ სკვერებს რეაბილიტაცია კიდევ რამდენიმე მისამართზე ჩაუტარდება.
