აჭარის სოფლის მეურნეობის სამინისტრომ წლიური ანგარიში წარადგინა. ანგარიშის წარდგენას აჭარის მთავრობის თავმჯდომარე თორნიკე რიჟვაძე დაესწრო.
ამის შესახებ ინფორმაციას აჭარის ავტონომიური რესპუბლიკის მთავრობა ავრცელებს.
მათივე ინფორმაციით, სამინისტრომ 2021 წელს გაწეული საქმიანობა შეაჯამა და 2022 წლის სამომავლო გეგმები წარადგინა. აჭარის მთავრობის თავმჯდომარემ მადლობა გადაუხადა სამინისტროს თანამშრომლებს წარმატებული საქმიანობისთვის.
„ჩვენ დავიწყეთ სოფლის მეურნეობის სამინისტროს სტრუქტურაში შემავალი უწყებების ეფექტურობაზე ზრუნვა და მომავალი წელი გარდამტეხი იქნება ამ მიმართულებით. ჩვენ ვახორციელებთ ხვნა-თესვის პროგრამას, რაც არის მნიშვნელოვანი ხელშეწყობა ფერმერებისთვის, რათა შექმნან ის დოვალთი, რაც მნიშვნელოვანია ამ პოსტპანდემიური პერიოდის გადასალახად. აჭარის სოფლის მეურნეობის სამინისტროსთვის პრიორიტეტულია ციტრუსის სეზონის წარმატებით დასრულება. მისასალმებელია, რომ საექსპორტო ბაზრების კუთხითაც გვაქვს მნიშვნელოვანი სიახლე და ჯამში ეს ღონისძიებები მოგვცემს საშუალებას, რომ სოფლის მეურნეობის დარგი რეგიონში ვაქციოთ პროდუქტიულ, თითოეულ მოქალაქეზე და ფერმერზე ორიენტირებულ დარგად“ , – განაცხადა თორნიკე რიჟვაძემ.
მიმდინარე წელს სოფლად მეწარმეობის განვითარების ხელშეწყობის ფარგლებში დაფინანსდა 15 წარმატებული პროექტი, როგორც პირველადი წარმოების, ასევე გადამუშავება-შენახვა-რეალიზაციის მიმართულებით.
„წელს პირველად სამინისტრომ განახორციელა გაერთიანებებისა და საოჯახო მეურნეობების განვითარების ხელშეწყობის პროგრამა, რომლის ფარგლებში დაფინანსდა 300-მდე სასოფლო-სამეურნეო გაერთიანებებისა და მცირე საოჯახო მეურნეობების მიერ წარმოდგენილი პროექტები.
რეგიონის ყველა მუნიციპალიტეტში განხორციელდა საგაზაფხულო სამუშაოების ხელშეწყობის პროგრამა, რომლის ფარგლებში უსასყიდლოდ დამუშავებდა 2150 ჰა მიწის სახნავ-სათესი ფართობი. ციტრუსის სეზონი შეუფერხებლად მიმდინარეობს, აჭარის მთავრობის გადაწყვეტილებით, არასტანდარტული ციტრუსის სუბსიდირება განხორციელდა.
გარემოსა და ბუნებრივი რესურსების დაცვა, ადამიანის ჯანმრთელობის უვნებელი გარემოს შენარჩუნება წარმოადგენს მნიშვნელოვან პრიორიტეტს. სამინისტრომ შეიმუშავა სოფლის მეურნეობის განვითარების პოლიტიკის გაძლიერება, რომლის მიზანიც იყო მდგრადი და ჯანსაღი გარემოს უზრუნველყოფა.
სოფლის მეურნეობის სამინისტროს 2022 წლის ბიუჯეტი გაიზარდა გასული წლის ბიუჯეტთან შედარებით 1 154 476 ლარით და შეადგინა 20 055 441 ლარი,”- ნათქვამია ინფორმაციაში.
