პარლამენტმა 2021 წლის სახელმწიფო ბიუჯეტში ცვლილებებს მხარი დაუჭირა. საბიუჯეტო ცვლილებები 80 ხმით დაამტკიცეს.
2021 წლის სახელმწიფო ბიუჯეტში განხორციელებული ცვლილებების თანახმად, შემოსულობების ნაწილი 166 მლნ ლარით იზრდება და 18 მლრდ 99 მლნ ლარს შეადგენს. ხარჯვითი ნაწილი 297 მლნ ლარით იზრდება და 19 მლრდ 796 მლნ ლარს შეადგენს, ხოლო ბიუჯეტის დეფიციტი მცირდება და 6,9%-ის ნაცვლად, 6,7%-ის ოდენობით განისაზღვრება.
“ხარჯვითი ნაწილის ზრდა მიმართული იყო ჯანდაცვის სექტორში დამატებითი ხარჯების აუცილებლობით. ეს ეხებოდა პანდემიასთან დაკავშირებული ხარჯების დაფინანსებას. ჩვენ გავითვალისწინეთ, რომ წლის მეორე ნახევარში საჭირო იქნებოდა დაახლოებით 4500-მდე საწოლის მობილიზება, თუმცა ვირუსის გავრცელებას ჰქონდა უფრო ფართო მასშტაბი და საბოლოო ჯამში, 9 000-ს გადააჭარბა მობილიზებული საწოლების რაოდენობამ. შესაბამისად, აუცილებელი გახდა დამატებითი ხარჯების გაწერა ინფიცირებული მოსახლეობის მკურნალობისთვის. ყოველივე ამან გამოიწვია აუცილებლობა, რომ ჯანდაცვის სექტორში დამატებითი ხარჯები მიგვემართა. სწორედ ეს იყო ის მთავარი მიზანი და მიზეზი, რის გამოც საჭირო გახდა 2021 წლის ბიუჯეტში ცვლილებების განხორციელება“, – განაცხადა ფინანსთა მინისტრის პირველმა მოადგილემ გიორგი კაკაურიძემ პლენარულ სხდომაზე.
მისი ინფორმაციით, ეკონომიკური ზრდის მაჩვენებელი არის 10%; მთლიანი შიდა პროდუქტის დეფლატორი – 8%. კაკაურიძის განცხადებით, 2021 წლის მთლიანი შიდა პროდუქტის ნომინალური მაჩვენებელი განსაზღვრულია 58,5 მლრდ ლარის ოდენობით. დეფიციტის მაჩვენებელი კვლავ შემცირებულია და განისაზღვრება 6,7 %-ით. ვალის მაჩვენებელი შემცირებულია და მიმდინარე წლის ბოლოსთვის 51,7 % იქნება.
მომხსენებლის ინფორმაციით, დაგეგმილთან შედარებით სახელმწიფო ბიუჯეტის საგადასახადო შემოსავლები 300 მლნ ლარის ოდენობით იზრდება. გარდა ამისა, მცირდება ვალის აღების მაჩვენებელი.
“რეალურად წელს ვალის აღების ნაცვლად, ჯამურად 300 მლნ ლარს შიდა ვალს დავფარავთ. რაც შეეხება საგარეო ვალს, იმ თანხების ხარჯზე, რომელიც პამდემიასთან დაკავშირებით საერთაშორისო პარტნიორების მიერ უკვე ჩამორიცხულია, აისახება ბიუჯეტში და საგარეო ვალის ნაწილი იქნება დაახლოებით 19 მლნ ლარის ოდენობით“, – განაცხადა ფინანსთა მინისტრის მოადგილემ.
როგორც გიორგი კაკაურიძემ აღნიშნა, ბიუჯეტში ზრდა განხორციელდა სამი მიმართულებით.
ჯანდაცვის სექტორში დაფინანსება ჯამში 376 მლნ ლარით იზრდება. აქედან 355 მლნ ლარით იზრდება პანდემიასთან დაკავშირებული ხარჯები, ხოლო 20 მლნ. ლარი ემატება სოციალურ მიმართულებას, რომელიც 60 წელს გადაცილებული პირების ვაქცინაციის წახალისებას მოხმარდება. ასევე, იზრდება თავდაცვის სამინისტროს დაფინანსება 60 მლნ ლარით და 16,0 მლნ ლარით დაგროვებითი საპენსიო სქემის თანადაფინანსება.
გიორგი კაკაურიძის ინფორმაციით, ხარჯვითი ნაწილის შემცირება ეხება საქართველოს ეკონომიკისა და მდგრადი განვითარების სამინისტროს, რომლის შემთხვევაში მცირდება ორი პროგრამის დაფინანსება. “აწარმოე საქართველოს“ ფარგლებში საკრედიტო საგარანტიო სქემისთვის გამოყოფილი თანხა მცირდება 35.0 მლნ ლარით და ასევე 22,6 მლნ ლარით ინტერნეტიზაციის პროგრამა მცირდება.
12 მლნ ლარით მცირდება საერთო სასამართლოებისთვის გამოყოფილი ასიგნებები.
სავალუტო კურსების და საპროცენტო განაკვეთების ცვლილების შედეგად სახელმწიფო ვალების მომსახურებისა და დაფარვისთვის გათვალისწინებული ასიგნებები ჯამში მცირდება 85,0 მლნ ლარით, მათ შორის: – საშინაო ვალის მომსახურება მცირდება – 20,0 მლნ ლარით; საგარეო ვალის მომსახურება მცირდება 50,0 მლნ ლარით; საგარეო ვალის დაფარვა მცირდება 15,0 მლნ ლარით.
