გახარიას გუნდის წევრს, რომელმაც გორის მერს რეპუტაცია ,,შეულახა”, სასამართლო სამსახურში აბრუნებს

194

გახარიას გუნდის წევრს გორის მერიაში დააბრუნებენ და განაცდურსაც აუნაზღურებენ. ამის შესახებ გადაწყვეტილება გორის სასამართლომ მიიღო.  საქმე ეხება შესყიდვების სამსახურის უფროსის მოადგილეს, ოლეგ ხუბულურს. ის 2021 წლის ივნისში გაათავისუფლეს გორის მერის, კოტე თავზარაშვილის რეპუტაციის შელახვის გამო. ამის შესახებ შიდა ქართლის საინფორმაციო ცენტრი წერს.

ოლეგ ხუბულურის ინტერებს ადამიანის უფლებათა ცენტრის იურისტი ლექსო მერებაშვილი იცავს. მისი განმარტებით, მხარეები კიდევ ერთ დეტალზე დავობენ – მოხდა თუ არა ოლეგ ხუბულურის დევნა პოლიტიკური ნიშნით. ამ ეტაპზე, ამ შეფასებისგან სასამართლომ თავი შეიკავა.

გორის მერიის ადმინისტრაციის და შესყიდვების ხელმძღვანელის მოადგილე ოლეგ ხუბულური დისციპლინური წარმოების შედეგად 2021 წლის 15 ივნისს სამსახურიდან გაათავისუფლეს.

ოლეგ ხუბულურის განცხადებით, ამის მიზეზი მის მიერ ოპოზიციური აზრის გამოთქმა გახდა. მისი თქმით, 13 მაისს უშუალო ხელმძღვანელმა მოსთხოვა განცხადების დაწერა სამსახურიდან წასვლის შესახებ, ვინაიდან იგი მიიჩნეოდა გორი-კასპის მაჟორიტარი დეპუტატის და პარტია “საქართველოსთვის” პოლიტსაბჭოს წევრ გიორგი ხოჯევანიშვილის და გათავისუფლებული მერის მოადგილეების გუნდის წევრად.

იმავდროულად, ხუბულურის თქმით, ხელმძღვანელმა მას განუმარტა, რომ იგი ასრულებდა მერის დავალებას.

2012 წლის 13 და 14 მაისს, გორის მუნიციპალიტეტის მერის დავალებით, შიდა აუდიტის და ინსპექტირების სამსახურმა აღრიცხა სტრუქტურული ერთეულების თანამშრომელთა სამსახურში დასწრება. აღრიცხვების პერიოდში ოლეგ ხუბულური არ იმყოფებოდა სამუშაო ადგილას. ის სამსახურში არ ყოფილა ასევე 17 მაისს.

გორის მერის ბრძანებით, ამ ფაქტზე დაიწყო დისციპლინური წარმოება. ოლეგ ხუბულურმა დაადასტურა მითითებულ დღეებში სამსახურში გამოუცხადებლობის ფაქტი. მისი თქმით, 17 მაისს ხელმძღვანელს ამის შესახებ მოკლე ტექსტური შეტყობინებით აცნობა და მიზეზები განუმარტა. თუმცა, წარმოების პროცესში დადგინდა, რომ ოლეგ ხუბულურს სამსახურში გამოუცხადებლობის შესახებ ხელმძღვანელისთვის დაუყოვნებლივ არ მიუმართავს.

დადგინდა, რომ 13, 14 და 17 მაისს სამსახურში მისი არყოფნა უშუალო უფროსთან შეთანხმებული არ იყო.

ამავე პერიოდში, გორის მერიის იურიდიულ განყოფილებაში განიხილეს ოლეგ ხუბულურის მიერ “ტვ პირველის” ეთერში გაკეთებული განცხადება. ოლეგ ხუბულურმა განმარტა, რომ მან აზრი გამოთქვა გარკვეულ პროცესებზე და ამ კომენტარში არ მოიაზრებოდა რომელიმე კონკრეტული დაწესებულება. მისი ეს სიტყვები შეფასდა, როგორც საჯარო ინტერესის და მუნიციპალიტეტის მერის რეპუტაციის შელახვა.

მერიამ დადგინდა, რომ ოლეგ ხუბულურმა დაარღვია “საჯარო დაწესებულებაში ეთიკისა და ქცევის ზოგადი წესების განსაზღვრის შესახებ” მთავრობის დადგენილება, სადაც წერია: “საჯარო მოხელე თავს იკავებს საჯარო კომენტარის გაკეთებისგან სამსახურებრივი საქმიანობის განხორციელებისას წარმოშობილი პირადი ინტერესის მქონე საკითხებზე, რომელმაც, შესაძლოა, ზიანი მიაყენოს საჯარო დაწესებულების რეპუტაციას.” ხუბულურის დისციპლინური გადაცდომები ერთობლიობაში შეფასდა, როგორც მძიმე დისციპლინური დარღვევა. საჯარო დაწესებულების რეპუტაციისა და საჯარო ინტერესის შელახვის საფუძვლით, გორის მერის 15 ივნისის ბრძანებით, ოლეგ ხუბულურის მიმართ დისციპლინური პასუხისმგებლობის ფორმად განისაზღვრა “სამსახურიდან გათავისუფლება”.

საია-ს შეფასებით, ადმინისტრაციული ორგანოს ეს გადაწყვეტილება კანონშეუსაბამოა. როგორც ზემოთ აღნიშნა, ოლეგ ხუბულურის კომენტარიდან არ ჩანს, რომ იგი რომელიმე კონკრეტულ დაწესებულებაზე საუბრობს. მისი ნათქვამი არის ზოგადი და შეეხება სისტემურ პრობლემას, რაც არ შეიძლება მიჩნეული იყოს, ერთი მხრივ, პირადი ინტერესის საკითხად, ხოლო მეორე მხრივ, კონკრეტული საჯარო დაწესებულების (როგორც ამას ზოგადი წესების შესაბამისი ნორმის დისპოზიცია მოითხოვს) რეპუტაციის შელახვად. ამის გათვალისწინებით, ხუბულურის ქმედება არ ექცევა დისკრედიტაციის აკრძალვის მუხლის დეფინიციის ფარგლებში. ამდენად, ორგანიზაცია მიიჩნევს, რომ ოლეგ ხუბულურის გათავისუფლება ოპოზიციურ აზრს და მის გამოხატვას უკავშირდება.

რაც შეეხება სამსახურში გამოუცხადებლობის ეპიზოდს, საჯარო სამსახურის შესახებ კანონის მიხედვით, სამსახურიდან გათავისუფლების ერთ-ერთი სავალდებულო საფუძველი მძიმე დისციპლინური გადაცდომის ჩადენაა. კანონი განსაზღვრავს პირობებს, რა დროსაც დისციპლინური გადაცდომა მიიჩნევა მძიმე დარღვევად. ოლეგ ხუბულურის მიერ სამუშაო საათების დროს სამსახურის უნებართვო დატოვება ან/და სამსახურში გამოუცხადებლობა, კანონით გათვალისწინებული პირობების მიხედვით, არ შეიძლება მძიმე გადაცდომად დაკვალიფიცირდეს. განსაკუთრებით მაშინ, თუ პირს მანამდე არ ჰქონია ჩადენილი ამგვარი ქმედება, ის ვერ გახდება მისი სამსახურიდან გათავისუფლების საფუძველი.