8 ნოემბერს, 20:00 საათზე, ოპოზიცია თავისუფლების მოედანზე საპროტესტო აქციას გამართავს.
როგორც „ნაციონალური მოძრაობის“ თავმჯდომარე, ნიკა მელიამ ბრიფინგზე განაცხადა, ხელისუფლებისთვის მიცემული ულტიმატუმის ვადა ამოიწურა და მათი ბრძოლა გამარჯვებამდე გრძელდება.
„ხვალ, 8 ნოემბერს, 20:00 საათზე, თავისუფლების გამარჯვება თავისუფლების მოედნიდან უნდა დავიწყოთ. ყველანი იქ, სადაც საქართველოს ისტორია არაერთხელ დაწერილა. ძალიან დიდი მადლობა, გამხნევდით და ყველაფერი მაგრად იქნება. ისტორიის წინაშე ქართული საზოგადოება დამარცხებული არასდროს გამოსულა და არც უახლოეს მომავალში გამოვა. ჩვენ გავიმარჯვებთ სიმართლის სახელით“, – განაცხადა მელიამ.
მელიას განცხადებით, დღეს სააკაშვილის ტყვეობაა თვალსაჩინო მაგალითი, რომ საქართველო ისტორიულ გზაჯვარედინზეა – დასავლეთი თუ რუსეთი.
„მინდა მოგმართოთ ქართველ პატრიოტებს, ჩვენი სამშობლოს გულშემატკივრებს. ხელისუფლებისთვის მიცემული ვადა, როგორც იცით, უკვე ამოიწურა და ივანიშვილის რეჟიმმა ქვეყნის მესამე პრეზიდენტის მიხეილ სააკაშვილის სიკვდილით დასჯის განაჩენი არ გააუქმა, აპირებს ბოლომდე მიიყვანოს მისი აღსრულება.
მინდა განვაცხადო და პირობა დავდო ჩემი და ჩემი მეგობრების სახელით, რომ ეს არ მოხდება. ჩვენ გადავარჩენთ ამ ქვეყნის ღირსებას. ქვეყნის ღირსება ვერ იქნება დაცული თუ ჩვენ, ახლა, უკვე მეორეჯერ საქართველოს კიდევ ერთ პრეზიდენტს მოვუკლავთ. დღეს, სწორედ სააკაშვილის ტყვეობა არის ყველაზე უფრო თვალსაჩინო მაგალითი იმისა, რომ საქართველო დგას ისტორიულ გზაჯვარედინზე – დასავლეთი თუ რუსეთი. დასავლური საქართველო ითხოვს სააკაშვილის თავისუფლებას, რუსული საქართველო კი ბედნიერია მისი ტყვეობით და მის სიკვდილს ელოდება. სწორედ ამიტომ ქვეყნის მესამე პრეზიდენტის გადარჩენაზე გადის დღეს ჩვენი ისტორიული არჩევანის ხაზი – ვირჩევთ დასავლეთს, თუ ვირჩევთ რუსეთს. შევძლებთ თუ არა ჩვენს შთამომავლებს ჩვენს შვილებს გამართულად და სირცხვილის გარეშე ჩავხედოთ თვალებში, თუ ჩვენი თანამონაწილეობით დაიწერება ჩვენი სამშობლოს ისტორიის ერთ-ერთი ყველაზე შავ-თეთრი ფურცელი, რასაც არ დავუშვებთ. სააკაშვილის გადარჩენა არის სიმბოლო ივანიშვილის დამარცხების და საქართველოს ნათელი მომავლის გამარჯვების. ჩვენი ბრძოლა არის საბოლოო და გადამწყვეტი. ჩვენ სხვა უფლება გარდა გამარჯვებისა აღარ გვაქვს, ყველა ხაზი გადალახულია და არის რისკი, იმისა რომ ავტორიტარული ბანანის რესპუბლიკას დავემსგავსოთ, რომელიც სიღარიბეში იხრჩობა და რუსეთის უბრალო ვასალი და შემსრულებელია. ეს ყველაფერი ხდება ჩვენს თვალწინ ეს რისკი დგას ხელშესახები”, – განაცხადა მელიამ.
ნიკა მელიას თქმით, იბრძვიან „მოპარული არჩევნების და მიტაცებული სახელმწიფოს დასაბრუნებლად“.
„ეს ბრძოლაც საყოველთაო, არა ერთპარტიული, არამედ ყველა პატიოსანი მოქალაქის საქმე. ჩვენ ვიბრძვით ჩვენი მომავალი თაობების შანსისთვის, ბავშობიდან იზრდებოდნენ არა დაპირისპირების, მტრობის სიძულვილის გარემოში, არამედ სხვადასხვა შეხედულებების, გემოვნების ადამიანებს გვქონდეს საშუალება თანამშრომლობის, მეგობრობის, შიშის გარეშე ცხოვრების, ამ უფლებების მოპოვებისთვის ვიბრძვით.
ჩვენ ვიბრძვით იმისთვის, რომ ბოლოს და ბოლოს 30 წლის თავზე აღარ გვისმენდნენ, აღარ გვატერორებდნენ, ხმის მიცემას აღარ გვაიძულებდნენ, გაღარიბებულ ადამიანებს 2 თეთრად 2 გროშად არ გვქრთამავდნენ, ოლიგარქიის წარმომადგენლები, ჟურნალისტებს არ კლავდნენ ველურები შუაგულ თბილისში, ევროკავშირის დროშას არ წვავდნენ ასევე რუსთაველის გამზირზე.
ჩვენ ვიბრძვით თუნდაც იმისთვის, რომ 4 შვილის დედას – ელენე ხოშტარიას, არ უწევდეს შიმშილობა იმისთვის რომ გადაგიჟებულ ხელისუფალს აუხსნას, რომ მკურნალობის უფლება ყველას აქვს ამ ქვეყანაში.
ჩვენ ვიბრძოლებთ ბოლომდე ამ ყველაფრისთვის.
ჩვენ ვიბრძვით, რომ საქართველო დასავლური ოჯახის ღირსეული წევრი იყოს და არ ჩაიგდოს ხელში რუსეთმა.
ასევე, ვიბრძვით იმისთვის, რომ სასამართლო არ იყოს მორჩილთა და მონათა კლანი, ვიბრძვით, რათა ყოველდღე არ გარბოდნენ ქვეყნიდან ახალგაზრდები, ყოველდღე ვიღაც არ კარგავდეს სამსახურს და ჩვენს ხარჯზე არ მდიდრდებოდეს ბიძინა ივანიშვილის წარმომადგენლობა საქართველოში“, – აღნიშნა მელიამ.
