ჩუღურეთში N125 ბაგა-ბაღის დემონტაჟი დაიწყო

664

თბილისის საბავშვო ბაგა-ბაღების მართვის სააგენტომ ჩუღურეთის რაიონში მდებარე N125 ბაგა-ბაღის ავარიული შენობის დემონტაჟი დაიწყო.

დედაქალაქის მერიის ცნობით, შემოდგომაზე იმავე ადგილას ახალი ბაღის მშენებლობა იგეგმება.

მათივე ინფორმაციით, მიმდინარე სამუშაოებს ბაგა-ბაღების მართვის სააგენტოს ხელმძღვანელი, კახაბერ გვანცელაძე რაიონის გამგებელ ზურაბ ჩიკვილაძესა და მაჟორიტარ დეპუტატ რიმა ბერაძესთან ერთად გაეცნო. შეხვედრას, სადაც კახაბერ გვანცელაძემ ბაღის მშენებლობის პროექტი წარადგინა, სკოლამდელი აღზრდის დაწესებულების თანამშრომლები და აღსაზრდელების მშობლებიც ესწრებოდნენ.

კახაბერ გვანცელაძის განცხადებით, არსებულ ტერიტორიაზე თანამედროვე სტანდარტების შესაბამისი საბავშვო ბაღი აშენდება, რომელიც ხუთ სააღმზრდელო ჯგუფზე იქნება გათვლილი. ბაღში სკოლამდელი განათლების მიღებას 160-მდე აღსაზრდელი შეძლებს.

„ახალი ბაღის მშენებლობას ჩვენ შემოდგომაზე დავიწყებთ და უკვე მომავალ სააღმზრდელო წელს მის ექსპლუატაციაში მიღებას შევძლებთ. ბაღი დააკმაყოფილებს ბავშვთა უსაფრთხოებისთვის განკუთვნილ სტანდარტებს და ჩვენი პატარები სააღმზრდელო პროცესს ამორტიზებული შენობის ნაცვლად, კეთილმოწყობილ გარემოში დაუბრუნდებიან“, – განმარტა კახაბერ გვანცელაძემ.

ცნობისთვის, N125 ბაგა-ბაღი რიგით მერვეა იმ ბაღებს შორის, რომლის ავარიული შენობის დემონტაჟსაც ბაღების მართვის სააგენტო თბილისის მერიის ქონების მართვის სააგენტოსთან ერთად ახორციელებს. შენობის დახურვის შემდეგ, ბაგა-ბაღის კონტინგენტი ახლომდებარე ბაღებში გადანაწილდა და მათი სააღმზრდელო პროცესი არ შეფერხებულა.