დედაქალაქის მერია თბილისში ავტობუსების რაოდენობას გაზრდის. თბილისის მერიაში აცხადებენ, რომ 15 მარშრუტია განსაზღვრული, სადაც მგზავრთა ნაკადი გაცილებით დიდია და ამ მარშრუტებზე ტრანსპორტის რაოდენობა 20-25%-ით გაიზრდება. ამს შესახებ ინტერპრესნიუსი წერს.
„დედაქალაქის სატრანსპორტო კომპანია ყოველდღიურ რეჟიმში აწარმოებს მუნიციპალურ ტრანსპორტში მგზავრთა ნაკადის მონიტორინგს. მგზავრთა რაოდენობა კვლავაც მნიშვნელოვნად არის შემცირებული და თითქმის განახევრებულია, ვიდრე ეს იყო პანდემიამდე არსებულ პერიოდში. თუმცა, გამოვლენილია რამდენიმე პრობლემური მარშრუტი, სადაც მგზავრთა ნაკადი გაცილებით დიდია. ასეთია ჯამში 15 ხაზი, რომელზეც მოძრაობს 120 ავტობუსი. შესაბამისად, თბილისის მერია გეგმავს, აღნიშნულ ხაზებზე 20-25%-ით გაზარდოს ავტობუსების რაოდენობა“, – აცხადებენ თბილისის მერიაში.
შეგახსენებთ, რომ თბილისში, საზოგადოებრივ ტრანსპორტში მგზავრთა გადატვირთულობის პრობლემაა, რის გამოც ეპიდემიასთან დაკავშირებული რეკომენდაციების დაცვა გართულებულია.
