დედაქალაქის მერმა კახა კალაძემ მთავრობის სხდომაზე თბილისის მეტროპოლიტენში განხორციელებულ სამუშაოებზე ისაუბრა. კახა კალაძის განცხადებით, საზოგადოებრივი ტრანსპორტი ერთ-ერთი მთავარი პრიორიტეტია.
„დაწყებული გვაქვს მეტროში მთელი რიგი სარეაბილიტაციო სამუშაოები – ძალოვანი კაბელების ცვლილება, არსებული ვაგონების განახლება-ჩანაცვლება და ა.შ. ძალოვანი ელექტროსადენებისა და გამნიავებელი სისტემის სრული რეაბილიტაციის პროექტი გასულ წელს დავიწყეთ. სამუშაოებს თურქული კომპანიების კონსორციუმი (Dogus და Elsitel) აზიის განვითარების ბანკის (ADB) მიერ „მუნიციპალური განვითარების ფონდისთვის“ გამოყოფილი დაფინანსების ფარგლებში ახორციელებს. სამუშაოების ღირებულება 15,4 მლნ აშშ დოლარია. პროექტის ზედამხედველი კომპანია ILF-ია (შვეიცარისა და ავსტრიის წარმომადგენლობები)“, – განაცხადა კახა კალაძემ.
მისივე თქმით, სამუშაოების ფარგლებში, უკვე დამონტაჟებულია, დაახლოებით, 500 კმ ძალოვანი და განათების კაბელი. ამ ეტაპზე, მიმდინარეობს ქვესადგურებში კაბელების მიერთება, რომელიც ხუთ მეტროსადგურში (ახმეტელი, სარაჯიშვილი, გურამიშვილი, სადგურის მოედანი, მარჯანიშვილი) უკვე დასრულებულია.
„რაც შეეხება გამნიავებელი სისტემის შეცვლას, პროექტით გათვალისწინებული 32 ვენტილატორიდან 30 კომპლექტი უკვე ჩამოსულია. ამ ეტაპზე, მიმდინარეობს ვენტილატორების მონტაჟი და მიერთება. 30-დან 12 ვენტილატორი უკვე დამონტაჟებულია.
პროექტის დასრულება მიმდინარე წლის ივლისისთვის იგეგმებოდა, თუმცა კორონავირუსით გამოწვეულმა პანდემიამ პროექტის განხორციელება შეაფერხა, რადგანაც ქვეყანაში უცხოელი ექსპერტები დროულად ვერ ჩამოვიდნენ და სამუშაოების წარმოებაც შეფერხდა. სამუშაოს მწარმოებელი და ზედამხედველი კომპანიების მოსაზრებით, ზემოაღნიშნულის გამო, სამუშაოების დასრულების გახანგრძლივდება და შესაბამისად, პროექტი ოქტომბრის შუა რიცხვებში დასრულდება.
აღნიშნული სამუშაოების დასაჩქარებლად და თურქული კომპანიის თხოვნის საფუძველზე, მუნიციპალიტეტის მერიის გადაწყვეტილებით, მიმდინარე წლის პირველ ივლისამდე, მეტროს მუშაობის დრო შემცირებული იყო და ნაცვლად 00:00 საათისა, მოძრაობა 23:00 საათზე სრულდებოდა. სამუშაოების გახანგრძლივების გამო, კომპანიამ მოგვმართა თხოვნით, აღნიშნული გადაწყვეტილება ძალაში დარჩეს და მეტროს მუშაობის დროდ პირველ ოქტომბრამდე კვლავ 06:00-დან 23:00 საათი განისაზღვროს“, – განაცხადა კალაძემ.
