კალაძე: ბიზნესსექტორისთვის და მცირე ბიზნესებისთვის ქალაქგეგმარებითი დოკუმენტების მომზადება გამარტივდება

1092

თბილისის მერის კახა კალაძის ინფორმაციით, ბიზნესსექტორისთვის და მცირე ბიზნესებისთვის ქალაქგეგმარებითი დოკუმენტების მომზადება გამარტივდება.

როგორც თბილისის მერმა დედაქალაქის მთავრობის სხდომაზე განაცხადა, ის წესები და კანონები, რაც ურბანული განვითარების კუთხით არსებობდა სერიოზულ პრობლემას წარმოადგენდა.

„ქალაქის ურბანული განვითარება ძალიან მნიშვნელოვანია ჩვენთვის. მთელი რიგი ცვლილებები იქნა განხორციელებული, ჩვენ მშენებლობებს არ ვეწინააღმდეგებით მაგრამ ეს ყველაფერი უნდა გაკეთდეს სწორად და ხარისხიანად, რომ არ მივიღოთ ისეთი უბნები, როგორიც არის მაგალითად სპორტის სასახლის უკან არსებული ტერიტორია, რომელიც სერიოზულ პრობლემას წარმოადგენს ქალაქისთვის და იქ მცხოვრები ადამიანებისათვის. რადგან ვსაუბრობთ ქალაქის ურბანულ განვითარებაზე, რამდენიმე ხნის წინ ირაკლი ხმალაძეს დავავალე, რომ ამ მიმართულებით ბევრი გამარტივებული საკითხი შემოგვეღო. ის წესები და კანონები რაც იყო ურბანული განვითარების კუთხით, სერიოზულ პრობლემას წარმოადგენდა და ბევრ რამესთან წინააღმდეგობაში მოდიოდა. შესაბამისად, დავალება რომელიც იყო გაცემული, რომ გაგვემარტივებინა ეს მიმართულება,“ – განაცხადა კახი კალაძემ.

დედაქალაქის ვიცე-მერის ირაკლი ხმალაძის ინფორმაციით კი, სამართლებრივი აქტების მომზადება უკვე პროცესშია და უახლოეს დღეებში ჩატარდება პრეზენტაცია, სადაც დეველოპერებს მიეწოდებათ ინფორმაცია, თუ რა ნაბიჯებს გადადგამს მუნიციპალიტეტი, რომ ქალაქგეგმარებითი დოკუმენტების მომზადების პროცესში გარკვეული სიმარტივე გაჩნდეს.