„ცენტრ პოინტის“ დაზარალებულების საკითხზე თბილისის მერია სამშენებლო სექტორის წარმომადგენლებს შეხვდება

484

თბილისის მერი კახა კალაძე დედაქალაქის მთავრობის დღევანდელ სხდომაზე სამშენებლო კომპანია „ცენტრ პოინტის“ დაზარალებულების საკითხს გამოეხმაურა.

კალაძის თქმით, შექმნილია საინიციატივო ჯგუფი და დაზარალებული ადამიანების პრობლემის მოსაგვარებლად მერია ყოველდღიურ რეჟიმში, აქტიურად მუშაობს.

ამასთან, კალაძის თქმით, მომდევნო კვირაში მერია სამშენებლო სექტორის წარმომადგენლებთან და დეველოპერებთან გაფართოებული შეხვედრის გამართვას გეგმავს, რათა მათთან განიხილოს ყველა ის პროექტი, რომელიც დასასრულებელია.

„აქტიურად დავიწყეთ მუშაობა, ყოველ კვირას გვაქვს შეხვედრები. შევქმენით სპეციალური საინიციატივო ჯგუფი დაზარალებული ადამიანებისგან და ყოველდღიურ რეჟიმში ვმუშაობთ. მინდა, მივმართო სამშენებლო სექტორს, დეველოპერებს, ჩვენ უკვე მივედით იმ ეტაპზე, სადაც გვჭირდება თქვენი ჩართულობა და თანადგომა. მომავალ კვირას ვგეგმავთ გავმართოთ დიდი შეხვედრა თქვენთან, და წარმოგიდგინოთ ყველა ის პროექტი, რომელიც უნდა დამთავრდეს. ამ ადამაინებს მივცეთ შესაძლებლობა, თავიანთი ფართები დაიბრუნონ, რაშიც თანხები აქვთ გადახდილი. დარწმუნებული ვარ, ამ პროექტს ბოლომდე მივიყვანთ“ ,- განაცხადა კახა კალაძემ.

კალაძე იმ ოჯახებს, რომლებიც რამოდენიმე წლის განმავლობაში იმყოფებიან მძიმე და გაურკვეველ  მდგომარეობაში მიმართავს, რომ მერია მათი პრობლემის მოსაგვარებლად ყველაფერს გააკეთებს.

ამასთან, კალაძის თქმით, დარწმუნებულია, ბევრი დეველოპერი, სამშენებლო კომპანია გამოეხმაურება.

„ჩვენი მხრიდან იქნება მაქსიმალური მხარდაჭერა და თანადგომა, რათა ეს პროექტები დროულად დასრულდეს“, -აღნიშნა კახა კალაძემ.

ასევე, კალაძემ ისაუბრა სამშენებლო კომპანია „სვეტის“ დაზარალებულების საკითხზეც და აღნიშნა, რომ სამშენებლო სამუშაოები უახლოეს მომავალში დაიწყება და დაზრალებულებს საცხოვრებელი ფართები გადაეცემათ.

„იცით, რომ სამშენებლო კომპანია „სვეტის“ მიერ დაზარალებული ადამიანების პრობლემა უკვე მოვაგვარეთ და წარმატებით დავასრულეთ მოლაპარაკებები სამშენებლო კომპანია მ2-თან. უახლოეს მომავლში დაიწყება უშუალოდ სამშენებლო სამუშაოები.დაზარალებულადამიანებს გადაეცემათ თავიანთი საცხოვრებელი ფართები, რაშიც თანხები ჰქონდათ გადახდილი“, – განაცხადა კალაძემ.