2018 წლის 2 ოქტომბერს, თბილისის მერიამ დაამტკიცა ღია მმართველობის პარტნიორობის (OGP) 2018-2020 წლების სამოქმედო გეგმა. ეს არის მეორე სამოქმედო გეგმა, რომელიც OGP-ის ქვე-ეროვნული საპილოტე პროგრამის ფარგლებში მომზადდა, სადაც თბილისის მუნიციპალიტეტი მსოფლიოს მასშტაბით 14 სხვა ქალაქთან ერთად მონაწილეობს.
წინა სამოქმედო გეგმა
თბილისის მერიამ პირველი სამოქმედო გეგმა 2017 წელს დაამტკიცა და ის ხუთ ვალდებულებას აერთიანებდა:
1. ღია მმართველობისა და სამოქალაქო ჩართულობის მრავალპროფილური მექანიზმი – საინფორმაციო და სამოქალაქო აქტივობის პორტალი “SMART MAP”;
2. პეტიციის დანერგვა მერიის სისტემაში;
3. ბიუჯეტის მონაწილეობითი დაგეგმვის მექანიზმის დანერგვა;
4. ბიუჯეტის ხარჯვის ინტერაქტიული ხელმისაწვდომობისა და სამოქალაქო კონტროლის მექანიზმების დანერგვა;
5. სერვისების სამოქალაქო კონტროლისა და ხელმისაწვდომობის მექანიზმების დანერგვა.
თბილისის მერიის OGP-ის 2017 წლის სამოქმედო გეგმაში არსებული ვალდებულებების უმეტესი ნაწილი არ შესრულდა. IDFI აქტიურად მონაწილეობდა როგორც პირველი, ისე მეორე სამოქმედო გეგმის შემუშავების პროცესში. სწორედ IDFI-ის რეკომენდაციით და უშუალო ჩართულობით მოხდა ელექტრონული პეტიციების ვალდებულების სამოქმედო გეგმაში შეტანა და მისი შემდგომი განხორციელება. ამჟამად, პეტიციების პორტალი – შენი იდეა ქალაქის მერს წარმატებით ფუნქციონირებს და მოქალაქეებს საშუალება აქვთ დაარეგისტრირონ იდეები და ხმა მისცენ მათთვის სასურველი საკითხების განხილვას.
2018-2020 წლების სამოქმედო გეგმა
თბილისის მერიამ OGP-ის მეორე სამოქმედო გეგმაზე მუშაობა 2018 წელს დაიწყო. ამისათვის ხელახლა შეიქმნა სამუშაო ჯგუფი, რომელიც 24 წევრს აერთიანებდა, საიდანაც 12 წევრი სამოქალაქო საზოგადოების და დონორი ორგანიზაციების წარმომადგენელი არის. ახალი სამოქმედო გეგმის შემუშავების პროცესში გაიმართა რამდენიმე სამუშაო შეხვედრა, სადაც თბილისის მერიის მიერ წარმოდგენილ იდეებთან ერთად, არასამთავრობო და საერთაშორისო ორგანიზაციების მიერ შემუშავებული ინიციატივებიც განიხილებოდა.
წინა გეგმის მსგავსად, ახალი სამოქმედო გეგმა ჯამში ხუთ ვალდებულებას აერთიანებს და ის წინა სამოქმედო გეგმაში შეუსრულებელ რამდენიმე ვალდებულებასაც მოიცავს:
– ღია მმართველობისა და სამოქალაქო ჩართულობის მრავალპროფილური მექანიზმი – საინფორმაციო და სამოქალაქო აქტივობის პორტალი (“SMART MAP”)
ეს ვალდებულება მოიცავს მრავალფუნქციური ვებ-პორტალის შექმნას, სადაც დატანილი იქნება ინტერაქტიული რუკა, რომელიც საშუალებას მისცემს მოქალაქეებს მიიღონ ინფორმაცია ქალაქში მიმდინარე ღონისძიებებზე/სამუშაოებზე და მოახდინონ მათ ირგვლივ არსებული პრობლემებზე რეაგირება.
– ბიუჯეტის მონაწილეობითი დაგეგმვის მექანიზმის დანერგვა
ამ აქტივობის ფარგლებში შეიქმნება ელექტრონული პორტალი, სადაც მოქალაქეებს საშუალება ექნებათ მიიღონ ინფორმაცია მუნიციპალიტეტის ბიუჯეტის და მისი პრიორიტეტების შესახებ, მონაწილეობა მიიღონ ბიუჯეტის დაგეგმვის პროცესში და ხმის მიცემის საშუალებით დააფიქსირონ საკუთარი მოსაზრებები იმ პრიორიტეტული მიმართულებების შესახებ, რომელიც მათთვის არის მნიშვნელოვანი.
– სერვისების ხელმისაწვდომობისა და მოქალაქეთა ჩართულობით გაუმჯობესების მექანიზმების დანერგვა
ვალდებულების ფარგლებში შეიქმნება ვებგვერდზე ინტეგრირებული ვებ-აპლიკაცია, სადაც გამოტანილი იქნება მუნიციპალიტეტის ყველაზე მოთხოვნადი ელექტრონული სერვისები. საწყის ეტაპზე, ვებ-აპლიკაციის საშუალებით შესაძლებელი იქნება მერიის გარემოს დაცვის, ტრანსპორტის და ზედამხედველობის საქალაქო სამსახურების სერვისების მიღება.
– ქალაქ თბილისის მუნიციპალიტეტის კეთილსინდისიერი და გამჭვირვალე მმართველობის სტრატეგია
აღნიშნული ვალდებულება სამოქმედო გეგმაში USAID-ის დემოკრატიული მმართველობის ინიციატივის (GGI) რეკომენდაციით მოხვდა. თბილისის მერიის მიერ მოხდება გამჭვირვალობის, ანგარიშვალდებულების და კეთილსინდისიერების სტანდარტების გაწერა სტრატეგიის საშუალებით, ხოლო ამის შემდეგ მოხდა სამოქმედო გეგმის შემუშავება და განხორციელება, სადაც მოცემული იქნება ის ღონისძიებები, რომლებიც მერიის და მის სისტემაში შემავალი დაწესებულებების გამჭვირვალე და კეთილსინდისიერი მმართველობის გაუმჯობესებას შეუწყობს ხელს.
– თბილისის მერიაში გამჭვირვალობის ხარისხის განვითარება ელექტრონული მექანიზმების მეშვეობით
ეს ვალდებულება სამოქმედო გეგმაში IDFI-ის რეკომენდაციით მოხვდა და მოიცავს ელექტრონული გამჭვირვალობის მექანიზმების გაუმჯობესებას. ვალდებულების ფარგლებში დაგეგმილია თბილისის მერიის ვებ-პორტალის განახლება IDFI-ის მიერ მომზადებული კონცეფციის თანახმად, რომელიც ღია საზოგადოების ფონდის მხარდაჭერით მომზადდა. გარდა ამისა, ვალდებულება ასევე ითვალისწინებს მერიის საჯარო ინფორმაციის გვერდის განახლებას, რაც ინფორმაციის მოძიებას უფრო მოქნილს და მარტივს გახდის. ვალდებულების მესამე კომპონენტში დაგეგმილია თბილისის მერიის ღია მონაცემების გვერდის შექმნა, სადაც თბილისის მერიაში დაცული საჯარო ინფორმაცია წარმოდგენილი იქნება დამუშავებად ფორმატში.
IDFI მიესალმება თბილისის მერიის მიერ OGP-ის 2018-2020 წლების სამოქმედო გეგმის დამტკიცებას. სამოქმედო გეგმის შესრულების პროცესში IDFI მნიშვნელოვნად მიიჩნევს წინა გამოცდილების გათვალისწინებას იმისათვის, რომ პროცესი ეფექტურად და დროულად წარიმართოს. აუცილებელია ვალდებულებების შესრულება სამოქმედო გეგმაში გათვალისწინებული ვადების მკაცრი დაცვით მოხდეს.
