თბილისის მერმა კახა კალაძემ დედაქალაქის მთავრობის სხდომაზე განაცხადა რომ, დიღმის ტყე-პარკი არის ლანდშაფტურ-სარეკრეაციო ზონა, სადაც სამომავლოდ საუკეთესო დასასვენებელი სივრცე უნდა მოეწყოს, რის გამოც იქ მშენებლობები დაუშვებელია. თბილისი მერი თანამშრომლობისკენ მოუწოდესბ იმ პირებს, რომლებიც დიღმის ტყე-პარკში მიწის ნაკვეთებს ფლობენ.
“კიდევ ერთი მნიშვნელოვანი სივრცე, რომელსაც თბილისისთვის სასიცოცხლო დატვირთვა აქვს, არის დიღმის ტყე-პარკი. სამწუხაროდ, 90-იანი წლებიდან მოყოლებული ამ პარკის ტერიტორიის გარკვეული ნაწილი მოექცა კერძო საკუთრებაში. დღესდღეობით მხოლოდ 17 ობიექტია მუნიციპალიტეტის საკუთრებაში, ხოლო ორი – სახელმწიფოს საკუთრებაში, დანარჩენი ტერიტორია, 47 ობიექტი კერძო საკუთრებაშია.
ეს არის ლანდშაფტურ-სარეკრეაციო ზონა და მინდა ყველა აქედანვე გავაფრთხილო, რომ იქ რაიმე სახის მშენებლობა წარმოუდგენელია. ერთადერთი, ვინც დაინტერესებულია იმით, რომ ეს ნაკევეთები დაიბრუნოს, გამოისყიდოს, ადგილმონაცვლეობა გააკეთოს, ეს არის დედაქალაქის მერია.
მინდა, თხოვნით მივმართო იმ ადამიანებს, ვინც ამ კონკრეტულ ტყე-პარკში ფლობს კონკრეტულ მიწის ნაკვეთებს, ითანამშრომლონ დედაქალაქის მერიასთან და ჩვენ ამ ნაკვეთების დაბრუნების შესაძლებლობა მოგვეცეს.
კიდევ ერთხელ ვიმეორებ, რომ იქ, ამ ადამიანებს არასდროს მიეცემათ იმის შესაძლებლობა, რომ რაიმე პროექტი განახორციელონ. ქალაქისთვის ეს სასიცოცხლოდ მნიშვნელოვანი მწვანე სივრცეა. დედაქალქის მერია კანონის ფარგლებში, ყველა ბერკეტს გამოიყენებს იმისათვის, რომ ეს ნაკვეთები ქალაქს დაუბრუნდეს და მომავალში იქ საუკეთესო დასასვენებელი სივრცე მოეწყოს“, -განაცხადა კალაძემ.
