სატრანსპორტო სფეროს სპეციალისტებს თბილისის მერიის სატრანსპორტო პოლიტიკასთან დაკავშირებით შენიშვნები აქვთ. ინფორმაციას Bm.ge ავრცელებს.
როგორც „ტრანსპორტისა და გზების ასოციაციის“ თავმჯდომარემ დავით მესხიშვილმა პრეზენტაციის დასრულების შემდეგ განაცხადა, ჯერ საზოგადოებრივი ტრანსპორტის განახლება უნდა მოხდეს და შემდეგ პარკირების სისტემის მოწესრიგება.
“მომეწონა ავტობუსების ჩანაცვლების დაპირება, ის ნამდვილად მისასალმებებლია. კითხვის ნიშნები გაჩნდა პარკირების ნაწილში, რადგან ჯერ უნდა განახლდეს საზოგადოებრივი ტრანსპორტი და მერე მოხდეს პარკირების განსაზღვრა ზონალურად. საკითხავია კიდევ ასე უნდა იყოს თუ არა. საქმე ისაა, რომ პარკირება გაძვირდება და ამისთვის საჭიროა საზოგადოებრივი ტრანსპორტი – ალტერნატივის სახით”, – აცხადებს დავით მესხიშვილი.
“საქართველოს ალიანსი უსაფრთხო გზებისთვის” გამგეობის თავმჯდომარე ეკა ლალიაშვილიც მიიჩნევს, რომ პარკირების სისტემის მოწესრიგებას საზოგადეობრივი ტრანსპორტის განახლება უნდა უსწრებდეს, რადგან ამან შესაძლოა, უხერხულობა შექმნას.
“პარკირების ზონირება მოიცავს იმას, რომ უნდა იყოს სხვადასხვა ღირებულების პარკირება – ბუნებრივია, ცენტრალურ უბნებში უფრო ძვირი იქნება ფასი, ვიდრე გარეუბნებში. 2019 წლის იანვრიდან იწყება პარკირების ზონირება და 2019 წლის ბოლოსკენ არის დაგეგმილი ავტობუსების სრულად ჩანაცვლება. იმედია, ეს ერთწლიანი ვადა უხერხულობას არ შექმნის, რადგან ზოგადად ჯერ პარკირების სისტემა იცვლება და მერე ახლდება საზოგადოებრივი ტრანსპორტი”, – აცხადებს ეკა ლალიაშვილი.
შეგახსენებთ, რომ დედაქალაქის მერმა კახა კალაძემ, ვიცე-მერთან, ირაკლი ხმალაძესთან ერთად, საზოგადოებას ახლადშემუშავებული სატრანსპორტო პოლიტიკა წარუდგინა. მერიის ცნობით, სატრანსპორტო პოლიტიკის მიზანი დედაქალაქის საცობებისგან განტვირთვა და ჰაერის დაბინძურების შემცირებაა.
