საკოორდინაციო საბჭოს გადაწყვეტილებით, მობილური ბრიგადები რეგიონებში სხვადასხვა დასახლებულ პუნქტებში გაიგზავნება, რათა აცრის მსურველ მოქალაქეებს სერვისი ადგილზე მიეწოდოს.
როგორც უწყებათაშორის საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ საკოორდინაციო საბჭოს სხდომის დასრულების შემდეგ განაცხადა, ჯერჯერობით არ განხილულა საკითხი, რომ ვაქცინაცია სავალდებულო გახდეს.
„აცრების ინტენსივობის გაზრდისა და ვაქცინაციაზე მაქსიმალური ხელმისაწვდომობის უზრუნველყოფის მიზნით, მობილური ბრიგადები გაიგზავნება სხვადასხვა რეგიონების სხვადასხვა დასახლებულ პუნქტებში, რათა აცრის მსურველ მოქალაქეებს სერვისი ადგილზე მიეწოდოს. შესაბამისი უწყებების მხრიდან კვლავ გაგრძელდება დადგენილი რეგულაციების ასრულების მკაცრი კონტროლი. უწყებათაშორის საკოორდინაციო საბჭო მოქალაქეებს კვლავ მოუწოდებს, დაიცვან რეგულაციები, ატარონ პირბადე როგორც დახურულ, ასევე ღია სივრცეში, დაიცვან სოციალური დისტანცია და ჩაერთონ ვაქცინაციის პროცესში.
როგორც მოგეხსენებათ, ქვეყანაში არის ჯანმრთელობის მსოფლიო ორგანიზაციის მიერ ავტორიზერებული ვაქცინები: „ფაიზერი“, ასტრაზენეკა“, სინოვაკი“ და „სინოფარმი“. შეგახსენებთ, რომ 1-ელი ოქტომბრიდან ქვეყანაში დამატებით შემოვიდა 1 მილიონი დოზა „სინოფარმი“,-განაცხადა ღიბრაძემ.
