საქართველოში ადგილობრივი თვითმმართველობის არჩევნებზე კენჭისყრა დასრულდა. ამ დროისთვის საუბნო საარჩევნო კომისიებში ხმის დათვლის პროცედურა მიმდინარეობს.
დღეს საქართველოს მოქალაქეებმა, მთელი ქვეყნის მასშტაბით, 64 საკრებულოს 2058 დეპუტატი და 64 მერი პირდაპირი წესით, 4 წლის ვადით აირჩიეს.
ხმის დათვლის შემდეგ, საოლქო საარჩევნო კომისიები, არაუგვიანეს 1 ნოემბრისა, შეაჯამებენ არჩევნების შედეგებს (გარდა თბილისის საკრებულოს და მერის არჩევნებისა) და არაუგვიანეს მომდევნო დღისა, შემაჯამებელ ოქმებს ცესკოს გადასცემენ.
რაც შეეხება თბილისის მერისა და საკრებულოს არჩევნების შედეგებს, მას თავად ცესკო არაუგვიანეს 9 ნოემბრისა შეაჯამებს.
იმ შემთხვევაში, თუ მერობის კანდიდატები არჩევნების დღეს ხმათა 50%-ზე მეტს ვერ დააგროვებენ, ცესკო გამარჯვებული კანდიდატის გამოსავლენად მეორე ტურს დანიშნავს. მერის არჩევნების მეორე ტური ტარდება 16 ნოემბრამდე, პირველი ტურიდან არაუგვიანეს 25-ე დღისა.
რაც შეეხება პროპორციულ არჩევნებს, ამ შემთხვევაში პარტიებმა 4%-იანი ბარიერი უნდა გადალახონ, ხოლო მაჟორიტარულ არჩევნებში ბარიერი არ არსებობს.
