გუდაურში, სტეფანწმინდასა და მესტიაში ტურიზმის სფეროში დასაქმების მსურველთათვის ტრენინგი ჩატარდა

69

შიდა ტურიზმის ხელშეწყობის და მომსახურების ხარისხის გაუმჯობესების მიზნით, გუდაურში, სტეფანწმინდასა და მესტიაში ტურიზმის სფეროში დასაქმების მსურველთათვის “სათავგადასავლო ტურიზმის გამყოლის მომზადების საბაზისო სასწავლო კურსი“ გაიმართა.

ტურიზმის ეროვნული ადმინისტრაციის ინფორმაციით, ჯამში 110 ადამიანზე მეტი გადამზადდა და სწავლებაში ძირითადად ადგილობრივი ახალგაზრდები მონაწილეობდნენ. ტრენინგი როგორც თეორიულ, ასევე, პრაქტიკულ სწავლებას მოიცავდა და მას გამოცდილი სამთო გიდები ატარებდნენ.

კურსის დასრულების შემდეგ მონაწილეებს შესაბამისი სერტიფიკატები გადაეცათ.

“საქართველოს ტურიზმის ეროვნული ადმინისტრაცია აგრძელებს სატრენინგო პროგრამას. ჩვენ წლის ბოლომდე მთელი საქართველოს მასშტაბით გადავამზადებთ 2 000-მდე ადამიანს სრულიად უსასყიდლოდ. მოხარულები ვართ, რომ ადგილობრივებს საშუალება მივეცით როგორც მესტიაში, ასევე, გუდაურსა და სტეფანწმინდაში დაეუფლონ ახალ პროფესიას, როგორიც არის სამთო გამყოლი. ეს ტრენინგი რამდენიმე დღეს გაგრძელდა და მოიცავდა როგორც თეორიულ, ასევე, პრაქტიკულ გადამზადებას“,-განაცხადა ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა.