თბილისის ბიუჯეტი დაახლოებით 1,5 მილიონი ლარით იზრდება. საკითხს საკრებულოს დღევანდელ სხდომაზე იხილავენ.
როგორც საკრებულოს უმრავლესობის ლიდერმა ჯაბა სამუშიამ განაცხადა, აღნიშნული თანხიდან ნახევარი მილიონი მერიის სარეზერვო ფონდში გადაირიცხება და თანხა მიმართული იქნება 2015 წელს სტიქიით დაზარალებული მეორე კატეგორიის რამდენიმე ოჯახის დასახმარებლად.
ჯაბა სამუშიას განმარტებით, თანხის ნაწილით რიგ უბნებში ინფრასტრუქტურული სამუშაოები განხორციელდება.
საკრებულოს ოპოზიცია დაგეგმილ ცვლილებებს წინასაარჩევნო პერიოდს უკავშირებს. როგორც “ნაციონალური მოძრაობის” წევრმა მარიკა დათუკიშვილმა განაცხადა, სტიქიით დაზარალებულების მიმართ წინასაარჩევნოდ გამოჩენილი ყურადღება ახალი არ არის და მსგავს მეთოდებს ხელისუფლება ხშირად მიმართავს.
აღნიშნულ პოზიციას იზიარებს თბილისის მერობის დამოუკიდებელი კანდიდატი ალექსანდრე ელისაშვილიც. მისი თქმით, პატარა ბავშვიც კი არ დაიჯერებს, რომ თბილისის ბიუჯეტის გაზრდა არჩევნებამდე 2 თვით ადრე არჩევნებთან არ არის კავშირში.
წყარო: ინტერპრესნიუსი
