მუნიციპალური განვითარების ფონდმა ოზურგეთის მუნიციპალიტეტში ასკანა-მშვიდობაური-ბახვის 7 კმ-იანი გზის რეაბილიტაციის სამუშაოები დაასრულა.
პროექტი ევროპის საინვესტიციო ბანკის მხარდაჭერით დაფინანსდა და მისი ღირებულება 3 მილიონ ლარს სცდება. დასრულებული სამუშაოები ფონდის პროექტების ზედამხედველობის სამსახურის უფროსმა ლევან სუხიტაშვილმა დაათვალიერა.
პროექტის ფარგლებში მოეწყო გზის 2 ფენიანი ასფალტო-ბეტონის საფარი, შეკეთდა არსებული 2 სახიდე გადასასვლელი და მოეწყო ახალი სანიაღვრე სისტემები.
პროექტის განხორციელება მნიშვნელოვნად გააუმჯობესებს და გაამარტივებს ოზურგეთის მუნიციპალიტეტის სამი სოფლის მოსახლეობის საავტომობილო მიმოსვლასა და ხელს შეუწყობს ტურიზმის განვითარებას.
