თელავში მოხალისე გოგონები ორ დღეში 23 ოჯახს დაეხმარნენ

545

კორონავირუსის საფრთხის გამო ქვეყანაში შექმნილი ვითარებიდან გამომდინარე, უამრავი ადამიანი დარჩა შემოსავლის გარეშე, ეს განსაკუთრებით ხანდაზმულ მოქალაქეებზე აისახა. ამის შესახებ კახეთის ხმა წერს. 

თელავში მცხოვრებმა ახალგაზრდა მოხალისე გოგონებმა მათი დახმარება გადაწყვიტეს. მათ მოხალისეობრივი საქმიანობა სამი დღის წინ დაიწყეს.

როგორც იდეის ერთ-ერთი ავტორი სოფო სუხიტაშვილი აცხადებს, კამპანია აქტიურად გაგრძელდება.

“მსგავსი მოხალისეობრივი ჯგუფი საქართველოს მასშტაბით შეიქმნა, რომლის იდეა იყო მოხუცების დახმარება, თუმცა ძირითადად ყურადღება თბილისზე მახვილდებოდა. ამიტომ მე და ჩემმა ბავშვობის მეგობრებმა გადავწყვიტეთ შეგვექმნა სოციალურ ქსელში ჯგუფი, სადაც თელავის მუნიციპალიტეტში მცხოვრებ ხანდაზმულ ადამიანებს დავეხმარებოდით. კამპანია 3 დღის წინ დავიწყეთ და ვერც კი ვიფიქრებდით, უკვე იმხელა გამოხმაურება მოჰყვა. ამ წუთშიც გვერიცხება თანხა. 2 დღეში შევძელით 23 ოჯახის დახმარება. ინფორმაციას გვაწვდიან გაჭირვებულ ოჯახებზე და მათაც ვეხმარებით, თუმცა ძირითადი აქცენტი მოხუცებზე გვაქვს აღებული.

მივიღებთ მოხალისეებს, რადგან 7 გოგო ვართ და ვცდილობთ მაქსიმალურად გადავნაწილდეთ, ყოველგვარი თავდაცვის საშუალებებით – ბახილებით, ხელთათმანებით, პირბადეებით. მთავარი მიზანია, რომ სისტემატიური ხასიათი მიეცეს, რადგან ერთჯერადი დახმარებით ვერაფერს გავხდებით. ყველა ადამიანს მინდა მადლობა გადავუხადო გვერდში დგომისთვის”, – განაცხადა სოფო სუხიტაშვილმა.

მოხალისეების ანგარიში:

თიბისი – GE60TB7555845061100046
საქართველოს ბანკი – GE13BG0000000160991670

“მნიშვნელოვანია ისიც, რომ მარტო ფულადი დახმარება არაა თქვენი ჩართულობის განმსაზღვრელი. ვისაც რითი შეგიძლიათ დახმარება, ყველანაირი საშუალება მისაღები და მნიშვნელოვანია”, – აღნიშნა სოფო სუხიტაშვილმა.

შეგახსენებთ, ახალი კორონავირუსის გავრცელების გამო, 21 მარტს საქართველოში საგანგებო მდგომარეობა, ხოლო 23 მარტიდან მარნეულისა და ბოლნისის მუნიციპალიტეტებში კარანტინია გამოცხადებული. მთავრობის დადგენილებით, აკრძალულია საჯარო სივრცეში 10 პირზე მეტის თავშეყრა და ისეთი სოციალური ღონისძიებები, რომელიც დაკავშირებულია 10-ზე მეტი ფიზიკური პირის შეკრებასთან.

უწყებათაშორისი სააკორდინაციო საბჭოს გადაწყვეტილებით, 18 მარტიდან ქვეყნის მასშტაბით სამარშრუტო ტაქსებით მოძრაობა შეიზღუდა. 23 მარტს კი მთავრობამ ყველა სახის საქალაქთაშორისო ტრანსპორტით გადაადგილება აკრძალა.

COVID-19-ის აფეთქება ჩინეთში 2019 წლის დეკემბერში დაიწყო და დღეისათვის ის მსოფლიოს 198 ქვეყანაშია გავრცელებული.  ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. ამ დროისთვის კორონავირუსი განსაკუთრებით ევროპის კონტინენტზე მძვინვარებს. საქართველოში ამჟამად COVID-19-ით ინფიცირების 81 შემთხვევაა დაფიქსირებული, საიდანაც 13 უკვე გამოჯანმრთელდა.