გორის მუნიციპალიტეტის სოფელ ქვეშში საბავშვო ბაღისთვის დამატებითი ფლიგელის რეაბილიტაცია დასრულდა. შენობის აღნიშნულ ნაწილში აღსაზრდელთა ახალი ჯგუფი განთავსდა. ინფორმაციას რადიო მოზაიკა ავრცელებს.
“ძალიან გვიჭირდა ქვეშში მცხოვრები ყველა ბავშვების მიღება ბაგა-ბაღში, ახლა კი ჩვენ არ დაგვრჩება არც ერთი მცირეწლოვანი სკოლამდელი აღზრდის გარეშე, სწორედ ამიტომ, დიდი მადლობა მინდა გადავუხადო USAID ZRDA პროექტს, ეუთოს საქველმოქმედო ფონდს და გორის მუნიციპალიტეტის მერიას ქვეშის ბაგა-ბაღში დამატებითი ჯგუფის გახსნის შესაძლებლობის მოცემისათვის“, – აღნიშნას სკოლამდე აღზრდის სააგენტოს ხელმძღვანელი, ლია კოვზიაშვილი.
ბაღის რეაბილიტაციისთვის შპს “აღმაშენებელი 2012“- თან ხელშეკრულება 2019 წლის 15 ოქტომბერს გაფორმდა.
სარემონტო სამუშაოების ღირებულება ხელშეკრულებით 111 998,70 ლარს შეადგენდა.
ხელშეკრულების ფარგლებში, თანამედროვე სტანდარტების მიხედვით რეაბილიტირდა ერთ – ერთი მოქმედი ფლიგელის დერეფანი და სრულად გარემონტდა მესამე ფლიგელი.
სამუშაოები USAID ZRDA პროექტის, ეუთოს და გორის მუნიციპალიტეტის სკოლამდელი აღზრდის სააგენტოს თანამშრომლობის შედეგად განხორციელდა. რეაბილიტაციის შედეგად საბავშვო ბაგა- ბაღს დაემატა ერთი ჯგუფი. დღეიდან ბაღი 100–მდე აღსაზრდელს მოემსახურება.
