11 ოქტომბრიდან 15 ოქტომბრის ჩათვლით მცხეთაში ავტოტრანსპორტის მოძრაობა და პარკირება შეიზღუდება

864

შინაგან საქმეთა სამინისტროს საპატრულო პოლიციის დეპარტამენტის ინფორმაციით, სვეტიცხოვლობის დღესასწაულთან დაკავშირებით, საზოგადოებრივი წესრიგისა და უსაფრთხოების დაცვის მიზნით, 11 ოქტომბრიდან 15 ოქტომბრის ჩათვლით, ქალაქ მცხეთის გარკვეულ ქუჩებზე ავტოტრანსპორტის მოძრაობა და პარკირება შეიზღუდება.

კერძოდ, 11 ოქტომბერს, მოძრაობა აიკრძალება სამხედროს ქუჩაზე, ხოლო 13 ოქტომბერს 21:00 საათიდან დაიკეტება დავით აღმაშენებლის ქუჩა, 14 ოქტომბერს კი მოძრაობა აიკრძალება მერაბ კოსტავას, მირიან მეფის და მიხეილ მამულაშვილის ქუჩებზე.

მცხეთის შემოსასვლელიდან ავტოტრანსპორტით გადაადგილება შესაძლებელი იქნება სპეციალური საშვებით.

მოძრაობა 15 ოქტომბერს, სადღესასწაულო ღონისძიებების დასრულებისთანავე სრულად აღდგება.