ზუგდიდში ორი ახალი საბავშვო ბაღი აშენდება

46

ზუგდიდში 2 ახალი საბავშვო ბაღი აშენდება. როგორც ზუგდიდის მერიაში აცხადებენ, მუნიციპალიტეტის მერი გიორგი შენგელია, ოკუპირებული ტერიტორიებიდან დევნილთა, შრომის, ჯანმრთელობის და სოციალური დაცვის მინისტრის მოადგილე მამუკა ცოტნიაშვილთან ერთად, ლტოლვილთა დანიის საბჭოს წარმომადგენლობის დირექტორს ვინსენტ დონტოტს შეხვდა და სწორედ ამ შეხვედრაზე განიხილეს 2 ახალი საბავშვო ბაღის მშენებლობის საკითხი.

“საბავშვო ბაღები პროექტის “ეკონომიკური მონაწილეობა, საცხოვრებლით უზრუნველყოფა და სოციალური ინფრასტრუქტურა იძულებით გადაადგილებულ პირთა და მასპინძელი თემებისათვის“ ფარგლებში აშენდება.

პროექტის დონორი გერმანიის რეკონსტრუქციისა და განვითარების ბანკი (kfw) და საქართველო-გერმანიის ფინანსური თანამშრომლობაა და მას ლტოლვილთა დანიის საბჭო, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსა და ადგილობრივ მუნიციპალიტეტებთან თანამშრომლობით ახორციელებს.

პროექტის მიზანია იძულებით გადაადგილებული და მასპინძელი თემების ინტეგრაციის ხელშეწყობა საქართველოში, სოციალური და საგანმანათლებლო სერვისების, გრძელვადიანი და მდგრადი საარსებო წყაროების შესაძლებლობების უზრუნველყოფით და დევნილთა საცხოვრებელი პირობების გაუმჯობესების გზით,”- ნათქვამია მერიის მიერ გავრცელებულ განცხადებაში.