თბილისის 50-ზე მეტ ბაგა-ბაღში სარეაბილიტაციო სამუშაოები დაიწყო.
თბილისის საბავშვო ბაგა-ბაღების მართვის სააგენტოს ინფორმაციით, რიგ ბაღებში იცვლება გზის საფარი, მიმდინარეობს მიწისქვეშა კომუნიკაციების რეაბილიტაცია, დაზიანებული სათამაშო მოედნების აღდგენა-განახლება, ახალი სპორტული და სათამაშო მოედნების მშენებლობა, სახურავების რეაბილიტაცია და პანდუსების მოწყობა.
სააგენტოს ხელმძღვანელის კახაბერ გვანცელაძის თქმით, ბაღების ინფრასტრუქტურა მუდმივ განახლებას საჭიროებს და სააგენტოს ბიუჯეტში მნიშვნელოვანი თანხებია გათვალისწინებული ამ პროექტების დასაფინანსებლად.’
“საკმაოდ დატვირთული ზაფხული გვაქვს ინფრასტრუქტურის მიმართულებით. ახალი მშენებლობების პარალელურად, ჩვენ ვგეგმავთ და ვახორციელებთ მოქმედი ბაღების სარემონტო სამუშაოებს ინდივიდუალური საჭიროების შესაბამისად. 50-მდე ბაღში ეზოს ინფრასტრუქტურას ვაწესრიგებთ, რაც მოიცავს სათამაშო მოედნების მოწყობას, ატრაქციონების მონტაჟს, საპარკო ინვენტარის დამატებას, საჩრდილობლების და ქვიშის მანეჟების მოწყობას, დაზიანებული კაუჩუკის საფარის შეცვლასა და პანდუსების მშენებლობას. ამავდროულად, 13 საბავშვო ბაღში იცვლება სახურავები. ხოლო მასშტაბური რემონტი ჩაუტარდება თბილისის N11, N12 და N197 ბაგა-ბაღებს,“ – განაცხადა კახაბერ გვანცელაძემ.
მისივე თქმით, სარემონტო სამუშაოების გარდა, სააგენტოს დაფინანსებით, 9 საბავშვო ბაღის გამაგრება-რეკონსტრუქცია მიმდინარეობს.
თბილისის მერიის ინფორმაციით, 2019 წელს საბავშვო ბაგა-ბაღების მშენებლობისთვის 50 მილიონი ლარია გამოყოფილი. მათივე ცნობით, ოქტომბრიდან დედაქალაქს კიდევ 5 საბავშვო ბაღი შეემატება.
