ბახტაძე: რეფორმის ფარგლებში 600 ათასზე მეტმა მოქალაქემ მიწა დაირეგისტრირა

პრემიერმინისტრმა მამუკა ბახტაძემ მიწის რეგისტრაციის რეფორმის შუალედური ანგარიშის პრეზენტაციაზე განაცხადა, რომ 2016 წლის 1 აგვისტოდან დღემდე 600 000-ზე მეტმა მოქალაქემ მიწა დაირეგისტრირა. მისი თქმით, რეფორმის ფარგლებში რეგისტრირებული მიწის ნაკვეთების ფართობი ჯამში 300 000 ჰექტარზე მეტს შეადგენს და დღეს ყველა ის სირთულე აღმოფხვრილია, რომელიც მიწის რეგისტრაციასთან იყო დაკავშირებული.

“მოგეხსენებათ, რომ წლების განმავლობაში მიწის რეგისტრაცია გახლდათ ერთ-ერთი ყველაზე რთული პრობლემა ჩვენი მოქალაქეებისთვის და სწორედ ჩვენმა პოლიტიკურმა გუნდმა დაიწყო ქმედითი ნაბიჯების გადადგმა ამ პრობლემის მოსაგვარებლად. რეფორმის შედეგად მნიშვნელოვნად გამარტივდა მიწის რეგისტრაციის პროცედურები და მოქალაქეებისთვის ეს სერვისი გახდა მაქსიმალურად ხელმისაწვდომი. ჩვენ დავიწყეთ რეფორმის ეს ეტაპი 2016 წლის 1 აგვისტოდან და დღემდე 600 000-ზე მეტმა მოქალაქემ დაიკანონა მიწა. დღეის მდგომარეობით, ფაქტობრივად, აღმოფხვრილია ყველა ის სირთულე, რომელიც დაკავშირებული იყო მიწის რეგისტრაციის პროცესთან.

მიწის რეგისტრაციის რეფორმის მიზანი, გარდა იმისა, რომ ქვეყანაში არ დარჩეს აღურიცხავი მიწები, გახლავთ ის, რომ დაცული იყოს მესაკუთრის უფლებები. სწორედ ეს გახლავთ ამ რეფორმის მთავარი იდეა.

2016 წლის 1 აგვისტოდან 2019 წლის თებერვლამდე გამარტივებული პროცედურებით 600 700-მდე განაცხადი წარმატებით დარეგისტრირდა. ჯამურად კი რეფორმის ფარგლებში რეგისტრირებული მიწის ნაკვეთების ფართობი 300 000 ჰექტარზე მეტს შეადგენს. პირადად ჩემთვის ძალიან მნიშვნელოვანია ის, რომ ამ რეფორმის განხორციელება ხდება თანამედროვე ტექნოლოგიების გამოყენებით,“ – განაცხადა მამუკა ბახტაძემ..

მიწის რეგისტრაციის რეფორმა 2016 წლის 1 აგვისტოს დაიწყო და 2019 წლის 1 ივლისამდე გრძელდება. მიწის ნაკვეთების რეგისტრაციისთვის მოქალაქეებს შეუძლიათ მიმართონ იუსტიციის სახლებს, საჯარო რეესტრის ფილიალებსა და საზოგადოებრივ ცენტრებს.

მსგავსი სიახლეები