ენმ: სასამართლოს გადაწყვეტილების საფუძველზე, გორის მერის იმპიჩმენტის საკითხს კვლავ დავაყენებთ

წინა სტატია

გორის რაიონულმა სასამართლომ მუნიციპალიტეტის საკრებულოს ფრაქცია ,,ნაციონალური მოძრაობის“ წევრების სარჩელი დააკმაყოფილა. ინფორმაციას ინტერპრესნიუსი ავრცელებს.

მოსამართლე დავით პაპუაშვილმა საკრებულოს სამანდატო-საპროცედურო და ეთიკის კომისიის მიერ მიღებული ის გადაწყვეტილება გააუქმა, რომლის საფუძველზეც საკრებულომ გორის მუნიციპალიტეტის მერის იმპიჩმენტის საკითხის განხილვაზე უარი თქვა.

გორის მუნიციპალიტეტის საკრებულოს ფრაქცია “ნაციონალური მოძრაობის“ წევრებმა მუნიციპალიტეტის მერის იმპიჩმენტის მოთხოვნით გორის რაიონულ სასამართლოს მიმართეს. ფრაქციის თავმჯდომარე ბექა ქორჩილავა აცხადებს, რომ კონსტანტინე თავზარაშვილი მერის პოსტზე არჩევის შემდგომ, რამდენიმე თვის განმავლობაში, შპს “მარინის“ დირექტორის თანამდებობას იკავებდა და კანონს არღვევდა, პარალელურად, კომპანიასთან თანამშრომლობაზე არც დეკლარაციაში აღნიშნა.

ამასთან, შეგახსენებთ, რომ კონსტანტინე თავზარაშვილი წელს შევსებულ დეკლარაციაში წერს, რომ შპს “მარინში“ ის 40%-იან წილს ფლობს, პარტნიორებად კი მეუღლე და ძმა ჰყავს მითითებული.

სასამართლომდე, იმპიჩმენტის მოთხოვნით ფრაქცია ,,ნაციონალურმა მოძრაობამ“ საკრებულოს სამანდატო-საპროცედურო და ეთიკის კომისიას მიმართა, თუმცა, საკითხმა ხმათა საჭირო რაოდენობა ვერ დააგროვა და შესაბამისად, საკრებულოზე განსახილველად ეს საკითხი არ გაუტანიათ.

გორის საკრებულოს თავმჯდომარე დავით რაზმაძე აცხადებს, რომ რაც უნდა მოხდეს, გორის მერს ვერ გადააყენებენ, რადგან საიმისოდ ნაციონალურ მოძრაობას ხმები არ ეყოფა.

“სასამართლომ ჩვენი სარჩელი სრულად დააკმაყოფილა, რითაც კიდევ ერთხელ დადასტურდა, რომ გორის მუნიციპალიტეტის მერი, რომელიც ამ პოსტზე არჩევის პარალელურად, რამდენიმე თვის განმავლობაში იკავებდა შპს. “მარინის“ დირექტორის თანამდებობას, კანონს არღვევდა. შესაბამისად, მისი იმპიჩმენტის საკითხს კვლავ ვაყენებთ და ახლა უკვე სასამართლოს გადაწყვეტილების თანხლებით. სამანდატო-საპროცედურო და ეთიკის კომისია ვალდებულია, ახალი დასკვნა დადოს“, – აცხადებს ფრაქცია “ნაციონალური მოძრაობის“ თავმჯდომარე ბექა ქორჩილავა.

მოსარჩელე მხარის ამ პოზიციას არ ეთანხმება გორის მუნიციპალიტეტის მერის ადვოკატი.

“რაც შეეხება ჩემს პოზიციას, სასამართლოსგან ვითხოვდი, რომ ამ საქმის განხილვა შეწყვეტილიყო. ამის მიზეზი კი გახლავთ ის ფაქტი, რომ საკრებულოს სამანდატო-საპროცედურო და ეთიკის კომისია არ გახლავთ უფლებამოსილი ორგანო, რომელსაც ამ საკითხზე გადაწყვეტილება უნდა მიეღო. მოგეხსენებათ, პრემიერთან მოქმედებს საჯარო სამსახურის ბიურო, რომელიც მსგავს საკითხებზე აწარმოებს მოკვლევას და იღებს შესაბამის განკარგულებას. აღნიშნულ საწარმოს წლებია ბრუნვა არ ჰქონია, ფაქტობრივად, უფუნქციოდ იყო. ჩვენ წარვადგინეთ საგადასახადო სისტემის მონაცემები ამ შპს-ს შესახებ 2010 წლიდან (ანუ, იმ პერიოდიდან, რაც მოქმედებს ელექტრონული სისტემა) კანონის არსებითი დარღვევა ნამდვილად არ იკვეთება. სასამართლოს გადაწყვეტილებით სამანდატო-საპროცედურო და ეთიკის კომისიას დაევალა საკითხის კანონით დადგენილი წესით განხილვა, რის საფუძველზეც, ვფიქრობ, შესაბამისი კომისია კიდევ ერთხელ იტყვის უარს ამ საკითხის საკრებულოს სხდომაზე განხილვაზე“, – აცხადებს კონსტანტინე თავზარაშვილის ადვოკატი ზაზა მათოშვილი.

ოპოზიციის გარდა კონსტანტინე თავზარადშვილის გადადგომას სამოქალაქო საზოგადოებაშიც ითხოვენ. “გადადგეს გორის მერი – კონსტანტინე თავზარაშვილი!”, – სწორედ ამ სახელწოდებით მოამზადეს მოქალაქეებმა მანიფესტი, რომელსაც ამ ეტაპზე 1 358 ხელმოწერა აქვს.

მსგავსი სიახლეები