გუდაურში საბაგიროების რეკონსტრუქციასა და მშენებლობისთვის გათვალისწინებული 75 მილიონიანი დაფინანსება 92 მილიონამდე გაიზარდა, ამასთან “მთის კურორტების განვითარების კომპანია” შესყიდვის გამარტივებული წესით განხორციელებას ითხოვს. ინფორმაციას ბიზნეს მედია ავრცელებს.
სახელმწიფო შესყიდვების სააგენტო საკითხს უკვე სწავლობს. გამარტივებული შესყიდვის მოტივად სახელმწიფოებრივი ღონისძიების შეზღუდულ ვადებში შეუფერხებლად ჩატარება სახელდება. კერძოდ პროექტი 2018 წლის განმავლობაში უნდა განხორციელდეს და სეზონის დაწყებამდე დასრულდეს, კლიმატური პირობების გამო კი სატენდერო პროცედურების ჩატარებას შემსყიდველი შეუძლებლად მიიჩნევს.
აღნიშნული თანხები საბაგიროების “სოლიკოსა” და “პირველის” დემონტაჟსა და სხვა ადგილზე გადატანას, “კუდების” საბაგიროს რეკონსტრუქციას, დამატებით სამი ახალი საბაგიროს მშენებლობას, საბაგიროების გამშვები სისტემების შეძენას და ახალი საბაგიროების ელექტრომომარაგების სისტემის შესყიდვას ითვალისწინებს. გარდა ამისა, გათვალისინებულია სასრიალო გზების გათოვლიანების მეორე ფაზის განხორციელებაც, რომელიც “სოლიკოსა” და “სნოუპარკის” სასრიალო გზებს მოიცავს.
