„ევროპული საქართველოს“ ქუთაისის ორგანიზაციამ მერიის ა(ა)იპ დაწესებულებებში დასაქმებულთა რაოდენობა და მათი წლიური ხარჯი შეისწავლა. ინფორმაციას ინტერპრესნიუსი ავრცელებს.
“ევროპული საქართველოს” წევრების განცხადებით, ქუთაისის მერიის 15 ა(ა)იპ-სა და შპს-ში ჯამში 3 649 ადამიანია დასაქმებული. აქედან შტატით – 3 469, ხოლო შტატგარეშე 180 თანამშრომელია. მათივე ინფრმაციით, დასაქმებულთა ხელფასზე თვეში 1 508 484.4 ლარი, ხოლო წელიწადში 18 101 817 ლარი იხარჯება.
“ევროპული საქართველოს” წევრი მერაბ მეშველიანი განმარტავს, რომ გაურკვეველია, ა(ა)იპ-ებში ხელფასების განსაზღვრის პრინციპი. მეშველიანის თქმით, შტატგარეშე თანამშრომლების ხელფასი შტატში მყოფი თანამშრომლების ხელფასს ბევრად აღემატება.
“ა(ა)იპ-ებსა და შპს-ებში განსხვავებულია დირექტორების ხელფასები. ასევე დირექტორებს ჰყავთ ორი, სამი მოადგილე, მრჩევლები, ამავდროულდ, დუბლირებულია საკითხები. ა(ა)იპ-ებში შექმნილია ორკაციანი განყოფილებები. დასაქმებულია პარტიული აქტივი. გაუმართლებელია ის ხარჯები, რასაც ქუთაისის მერია ამ მიმართულებით ხარჯავს“, – განაცხადა მერაბ მეშველიანმა.
ოპოზიციური პარტიის მიერ წარმოდგენილი ინფორმაციის მიხედვით, ერთ-ერთი ყველაზე მაღალბიუჯეტიანი ორგანიზაცია კულტურულ დაწესებულებათა ა(ა)იპ-ია, სადაც 386 თანამშროემლი მუშაობს, მათ სახელფასო ანაზღაურებას კი ყოველწიურად 3 550 900 ლარი ხმარდება.
2100 ლარს იღებს მერიის „ა(ა)იპ სპეციალური სერვისების“ უფროსი, სადაც 513 თანამშრომელია დასაქმებული, ხოლო წლიურად მათი თანამდებობრივი სარგოსთვის 3 მილიონ ლარზე მეტია გათვალისწინებული. 2000 ლარი აქვს ხელფასი მერიის ახლადშექმნილ ა(ა)იპ „ქუთგანათების“ უფროსს, მისი თანამშრომლების ხელფასზე კი წლის განმავლობაში 3 460 000 ლარია გამოყოფილი.
არის ხშირი შემთხვევები, როცა ა(ა)იპ-ებს საზოგადოებასთან ურთიერთობის სპეციალისტები დაწესებულებაშიც და მის ფილიალებშიც ჰყავს.
“ევროპული საქართველო” ქუთაისის მერიას მოუწოდებს შეამციროს ააიპ დაწესებულებების ხარჯები და დაზოგილი თანხით სოციალური სფეროები დააფინანსოს.
