თბილისის საკრებულოს ნაციონალი წევრები მეტროს მემანქანეებს სოლიდარობას უცხადებენ

1238

წინა სტატია

თბილისის საკრებულოს ფრაქცია „ნაციონალური მოძრაობა“ თბილისის სატრანსპორტო სამსახურის თანამშრომლებს სოლიდარობას უცხადებს. პარტიის წევრი, დეპუტატი ირაკლი ნადირაძე დედაქალაქის მერს მოუწოდებს, 2018 წლის ბიუჯეტში ცვლილებები შეიტანოს. „ნაციონალური მოძრაობა“ შემდგომ ეტაპზე თბილსერვისის და ბაღებში დასაქმებული ადამიანებისთვისაც ითხოვს ხელფასების მომატებას. ინფორმაციას “საზოგადოებრივი მაუწყებელი” ავრცელებს.

„მივმართავთ კახა კალაძეს, დაიწყოს თბილისის 2018 წლის ბიუჯეტის ცვლილებებზე მუშაობა, სადაც ის რეალურად შეამცირებს ბიუროკრატიას. ბიუროკრატიის შემცირება შეიძლება არანაკლებ 40 მილიონი ლარით. დაზოგილი თანხები მოხმარდება თბილისელების საჭიროებებს და მათ შორის, მოხმარდება თბილისის სატრანსპორტო სამსახურის თანამშრომლების სამუშაო პირობების გაუმჯობესებას. ჩვენ დათვლილი გვაქვს ციფრები და თბილისი სატრანსპორტო კომპანიის რიგითი თანამშრომლებისთვის და არა ტოპმენეჯმენტისთვის, რომელთა ხელფასებიც ხშირად ოთხჯერ და ხუთჯერ აღემატება მემანქანეების, მძღოლების, ხელფასებს, აი, სწორედ ამ ადამიანების ხელფასების გაუმჯობესება შეიძლება არანაკლებ 20 პროცენტით“, – განაცხადა „ნაციონალური მოძრაობის“ დეპუტატმა ირაკლი ნადირაძემ.

მეტროს მემანქანეების განცხადებით, იმის გამო, რომ სატრანსპორტო კომპანიასთან ხელფასების ზრდის საკითხზე შეთანხმებას ვერ მიაღწიეს, 3 მაისიდან გაიფიცებიან. 

თბილისის მეტროპოლიტენის მემანქანეები საათობრივი ანაზღაურების გაზრდას 2 აპრილიდან ითხოვენ. მერიამ მეტროპოლიტენის მემანქანეებს ხელფასის გაზრდაზე უარი უთხრა.