“ერთიანი აგროპროექტის“ ფარგლებში, მარნეულში კენკრის ახალი ბაღი გაშენდა. ინფორმაციას მარნეულის მუნიციპალიტეტის მერია ავრცელებს. ამავე წყაროს თანახმად, “ერთიანი აგროპროექტის“ ფარგლებში, ამხანაგობამ “ქართული კენკრა“, მარნეულის მუნიციპალიტეტის სოფელ ახლომახმუდლოში ჟოლოს და მაყვლის ბაღი 7 ჰა-ზე გააშენა.
“ქართული კენკრა“ პროგრამაში – “დანერგე მომავალი“ 2017 წელს ჩაერთო და ბაღის გაშენებისა და სარწყავი სისტემების მოწყობისთვის 53,305 ლარის ოდენობის სახელმწიფო დაფინანსება მიიღო, აქედან, 35,805 ლარი ნერგებისთვის, ხოლო 17,500 ლარი-წვეთოვანი სისტემებისთვის.
ამხანაგობა 3 ქალბატონის სტარტაპია, რომლებმაც გადაწყვიტეს, საქმიანობა სოფლის მეურნეობის მიმართულბით დაეწყოთ და კენკრის ბაღი გააშენეს.
პროექტის – “დანერგე მომავალი“ ფარგლებში, საქართველოს მასშტაბით, ხეხილის ახალი ბაღები 4,293 ჰექტარზეა გაშენებული. სახელმწიფო დაფინანსების მოცულობა 22,271,868 მილიონ ლარს შეადგენს.
სოფლის მეურნეობის პროექტების მართვის სააგენტო “აწარმოე საქართველოში – ბიზნესის“ ფარგლებში, ახორციელებს “ერთიან აგროპროექტს“, რომელიც გათვლილია გრძელვადიან განვითარებაზე და მისი მიზანია ისეთი გარემოს შექმნა, რომელიც ხელს შეუწყობს სოფლის მეურნეობაში კონკურენტუნარიანობის ამაღლებას, მაღალხარისხიანი პროდუქციის წარმოების სტაბილურ ზრდას, სურსათის უვნებლობის საერთაშორისო სტანდარტების დანერგვას”, – წერია მარნეულის მუნიციპალიტეტის მერიის მიერ გავრცელებულ ინფორმაციაში.
